जशपुरिया माटी अटल सुशासन समारोह म संघरिन मुख्यमंत्री श्री विष्णु देव साय

जशपुर, 28 दिसंबर, 2023। जशपुरिया माटी अटल सुशासन समारोह म छत्‍तीसगढ़ के मुख्‍यमंत्री श्री विष्णु देव साय संघरिन। उमन कार्यक्रम ल  सम्बोधित करत कहिन के आज जशपुर नगर के ये पावन धरती म सुशासन हफ्ता के अंतर्गत आयोजित ये कार्यक्रम म आप मन सब के स्वागत हे। छत्तीसगढ़ के मुख्यमंत्री पद के दायित्व संभाले के बाद पहली पइत मैं जशपुर आए हंंव। आप मन ह जेन प्यार अऊ दुलार के संग मोर स्वागत करे हव ओखर बर सब ल धन्यवाद। उमन कहिन के मैं जशपुर के जमीन ल प्रणाम करत हंंव। ये मोर कर्म भूमि रहे हे। स्वर्गीय जूदेव जी मोर राजनीति के आदर्श रहे हें। जशपुर आगमन म आप मन मोर जेन स्वागत करेव ओला में जीवन भर नइ भुला पांंव। ये स्वागत मारेच नहीं पूरा जशपुर के स्वागत ये। उमन कहिन के आप मन के बेटा ल बहुत बड़ दायित्व मिले हे, ओला मैं पूरा करहूं। में हमेशा जशपुर के नाम रोशन करत रहूं। सबो वर्ग के चिंता करत हमन छत्तीसगढ़ के मनखे मन ले वादा करे रहेन। प्रधानमंत्री श्री नरेन्द्र मोदी जी ह आप मन ल गारंटी देहे रहिन कि हमर पहला काम 18 लाख आवासहीन मन के मकान बनाना होही। 13 तारीक के हमन शपथ लेन अऊ 14 के प्रधानमंत्री आवास बनाए के निर्णय लेन। शपथ-ग्रहण के दूसरेच दिन कैबिनेट के बैठक बला के प्रधानमंत्री आवास योजना ले 18 लाख परिवार ल लाभान्वित करे के गारंटी पूरा करेन। विधानसभा म एखर बर बजट घलोक पारित करवा लेहे गीस। 25 दिसंबर के सुशासन दिवस के अवसर म राज्य के 12 लाख ले जादा किसान मन के बैंक खाता म दू साल के बकाया बोनस के राशि 3716 करोड़ रुपिया के अंतरण घलोक कर दे गीस।