जशपुर के नाशपाती के स्वाद पहुंचिस दूरिहा-दूरिहा ले

रइपुर, 28 जुलाई 2021 बुधवार। छत्तीसगढ़ म परम्परागत खेती-किसानी के संग लोगन अब आजीविका के नवा क्षेत्र मन म तको आगू बढ़त हे । राज्य सरकार कोति ले नवाचार ल सरलग पलौंदी देहे के संग जादा ले जादा लोगन तक एकर लाभ पहुंचाए के उदीम करे जावत हे। नवाचारों के दिशा म कदम बढ़ावत जशपुर जिला के किसान मन ह नाशपाती के खेती ल बड़े पैमाना म अपनाए हवय। इहां के बगीचा-सन्ना क्षेत्र के किसान अबड़ जादा मात्रा म एकर खेती करत हवय। जिला के लगभग 17 सौ किसान नाशपाती के उत्पादन ले जुड़े हे। इहां 750 हेक्टेयर क्षेत्र म लगभग 700 टन नाशपाती के उत्पादन होथे।
दीर्घवर्ती फसल के रूप म नाशपाती के उत्पादन करके किसान हर साल अच्छा मुनाफा कमावत हवय। दिल्ली,रांची जइसन बड़े शहर मन के संग उत्तर प्रदेश सहित कईयोन राज्य मन म इहां के नाशपाती के मांग होए लगे हे। एकर लाभ माइलोगन मन ल देहे बर जिला प्रशासन कोति ले स्व-सहायता समूह के माइलोगन मन ल एकर वैल्यू चेन मार्केटिंग ले जोड़े गे हवय। जेकर ले उन ल रोजगार के नवा साधन उपलब्ध होए अउ वोमन जशपुर के नाशपाती के स्वाद दूर दराज तक पहुंचाए म सहयोग करत हावय ।