कृषि विभाग ले मिले प्रशिक्षण ले खेती करे म होवत हे सहूलियत-किसान सूरजनाथ
जशपुरनगर, किसान मन ल आर्थिक रूप ले संबल बनाए अऊ नवा फसल लेहे बर कृषि विभाग कोति ले सरलग कई ठन प्रशिक्षण अऊ कार्यशाला के आयोजन करके किसान मन ल आधुनिक खेती ले जोड़े जात हे। जेखर से किसान के फलस म बढ़ोतरी हो सकय अऊ ओ मन अपन आमदनी ल दुगुना कर सकयं। कृषि विभाग के उदीम ले लाभांवित दुलदुला विकासखंड के ढोढ़ीआरा गांव के निवासी किसान सूरजनाथ सिंह ह प्रशिक्षण अऊ कृषि विभाग के सलाह ले आधुनिक खेती करके 72 हजार रूपिया के आमदनी कमाए हे।
किसान सूरजनाथ के बताती वोखर तिर करीबन 22 एकड़ जमीन हे। पउर साल कृषि विभाग के केन्द्र प्रवर्तित बीज ग्राम योजना अंतर्गत ओ ल अरहर (राहेर) बीज 12 किलोग्राम देहे गए रहिस। जेन ल वो डेढ़ एकड़ म अरहर अऊ मूंगफली अऊ 1 एकड़ म तिलहन अफ आधा एकड़ म सब्जी के खेती करिस। वोकर बताती समय-समय म ओ फसल म प्रशिक्षण के समय जाने तरीका मन ले पोषक खाद अऊ दवई के छिंचिस। जेखर से ओखर फसल के उपज जादा मात्रा म होइस।
वो ह बताइस कि जब मैं पहिली परंपरागत विधि ले खेती करत रहेंव त मेहनत के मुताबिक फसल के उपज नइ मिल पात रहिस। फेर प्रशिक्षण के बाद आधुनिक तकनिकी के उपयोग करके खेती करे ले 1 साल म 6 कुंटल अरहर, मूंगफली 4 कुंटल अऊ तिल(तीली) के उत्पादन 2 कुंटल होइस। फसल ले ओला 72 हजार रूपिया के आमदनी होइस। वोकर कहना हे कि प्रशिक्षण के बाद जब खेती के उपज बनेच होइस त वो जादा प्रोत्साहित होइस। अब ओ ह अऊ जादा उत्साह के संग खेती करही। अवइया साल ओ ह अऊ जादा रकबा म दलहन अऊ तिलहन के खेती करही। एकर संगें संग अपन आस पास के किसान मन ल घलोक आन फसल लेहे बर प्रोत्साहित करही। जेखर से ओ मन ल घलोक आर्थिक रूप ले बने आमदनी हो सकय। एकरे संग वो ह प्रशिक्षण बर जिला प्रशासन अऊ कृषि विभाग के अधिकारी मन ल धन्यवाद दीस।
