भानुप्रतापपुर, 9 दिसम्बर 2020। नक्सल प्रभावित क्षेत्र म ड्यूटी करत अऊ जवान ह जान दे दीन। अंतागढ़ म सीमा सुरक्षा बल के जवान ह फांसी लगा के आत्महत्या कर लीस हे। जवान के नाम स्वराज पीएल बताय हे। जवान केरल के वायनाड के रहवइया रिहिस। आत्महत्या करे के कारण के अभी पता नई चल पाय हे। बताय जावत हे कि आरक्षक मानसिक तनाव ले गुजरत रिहिस। प्रदेश म 10 दिन के अंदर 4 जवान मन ह खुदकुशी करे हे। ज्यादातर मामला म तनाव के वजह बताय जावत हे। एखर पहली 30 नवंबर के बीजापुर जिला के कुटरु थाना इलाका म पुलिसकर्मी ह फांसी लगा के खुदकुशी कर लीस।
29 नवंबर के धुर नक्सल प्रभावित क्षेत्र पामेड़ थाना म पदस्थ एक आरक्षक ह अपन सर्विस रायफल ले खुद ल गोली मार के खुदकुशी कर लीस। 29 नवंबर के ही जिला के पुसपाल थाना म तैनात सीएएफ के जवान दिनेश वर्मा ह खुद ल गोली मार के आत्महत्या कर लीस। दिनेश वर्मा पुसपाल थाना म तैनात रिहिस अऊ दुर्ग जिला के भिलाई के रहने वाला रिहिस।
गुरतुर गोठ बर- भीषम वर्मा
