बीजापुर जिला म 457 करोड़ रूपिया के लोकार्पण-भूमिपूजन कार्य मन के सौगात देहे के मौके म मुख्यमंत्री दाऊ भूपेश बघेल ह कहीन
पहिली आम जनता ल मीटिंग आदि के बाद सांझ होय म घर पहुँचे म डर लगय, अब सुरक्षित महसूस करत हावय
जिला अस्पताल बीजापुर के नामकरण महादेव राणा शासकीय जिला चिकित्सालय बीजापुर करे के करीन घोषणा
रायपुर, 18 सितंबर, 2023
जिला स्तरीय भेंट मुलाकात खातिर बीजापुर जिला के प्रवास म पहुँचे मुख्यमंत्री दाऊ भूपेश बघेल ह 457 करोड़ 58 लाख रुपिया के विकास कार्यमन के लोकार्पण अउ भूमिपूजन के बेरा म अपन संबोधन म कहीन कि नक्सल प्रभावित जेन क्षेत्र के बंद स्कूल मन ले पहिली गोली मन आरो आवत रिहिस हे उहां अब लइका मन पोयम गावत हें। अभीन कुछ लइका मन ले गोठबात करीन। वोमन फर्राटेदार अंग्रेजी बोलत रिहिस हे। येह बीजापुर के बदलाव हरे। पहिली आम जनता ल मीटिंग आदि के बाद सांझ होय म घर पहुँचे म डर लगय, अब सुरक्षित महसूस करत हावय।
मुख्यमंत्री ह ये बेरा म 123 करोड़ रुपिया के राशि ले बने संरचना मन के लोकार्पण करीन अउ 334 करोड़ रुपिया ले बनइया अधोसंरचना मन के भूमिपूजन करीन। संगे संग उन मन हितग्राहीमूलक सामग्री के तको बॉटिन ा मुख्यमंत्री ये बेरा म ईंटपाल म नवनिर्मित बीजापुर गारमेंट फैक्ट्री के लोकार्पण तको करीन अउ इहां कार्यरत माइलोगन मन ले गोठबात करके फैक्ट्री म चलत गतिविधि मन के जानकारी लीन। संगे संग उन रूरल इंडस्ट्रियल पार्क के तको अवलोकन करीन। साथ ही उन मन जिला म 4 करोड़ रुपिया ले सेंट्रल लाइब्रेरी के लोकार्पण करीन। ये बेरा म मुख्यमंत्री ह कलेक्ट्रेट परिसर म छत्तीसगढ़ महतारी के प्रतिमा के मुँहदेखाई तको करीन।
मुख्यमंत्री ह ये मौका म जिला अस्पताल बीजापुर के नामकरण महादेव राणा शासकीय जिला चिकित्सालय बीजापुर करे के घोषणा करीन। उन मन बीजापुर जिला के आवापल्ली स्थित उसूर चौक ल नागुर दोरला चौक के नाम ले नामकरण करे के घोषणा करीन। साथ ही वोमन नवीन शासकीय आदर्श महाविद्यालय जावंगा( गीदम) के नामकरण वीरांगना मासक देवी नाग शासकीय आदर्श महाविद्यालय के नाम म करे के घोषणा करीन। येकरे संगे संग उन मन चेरपाल, वरदली, संकनपल्ली अउ पापनपाल म नवीन धान उपार्जन केंद्र अउ मादेपुर अउ जारपल्ली म नवीन प्राथमिक शाला खोले के घोषणा करीन।