सामान्य महिला वर्ग बर आरक्षित होइस रायपुर जिला पंचायत
रायपुर, छत्तीसगढ़ पंचायत राज अधिनियम के प्रावधान के मुताबिक त्रिस्तरीय पंचायत आम निर्वाचन 2019-20 प्रदेश के सबो 27 जिला मन के जिला पंचायत अध्यक्ष पद के आरक्षण आज स्थानीय न्यू सर्किट हाउस के सभा कक्ष म पूरा होइस। उप सचिव सह संचालक पंचायत अऊ ग्रामीण विकास विभाग श्री जितेन्द्र कुमार शुक्ला अऊ जनप्रतिनिधि मन के उपस्थिति म लॉटरी के प्रक्रिया पूरा करे गीस, जेमां अनुसूचित जनजाति वर्ग बर 13, अनुसूचित जाति वर्ग बर तीन, आन पिछड़ा वर्ग बर सात अऊ सामान्य वर्ग बर चार जिला मन म जिला पंचायत के अध्यक्ष पद आरक्षित करे गीस। आरक्षण के कार्यवाही 2011 के जनगणना के आधार म करे गीस।
लॉटरी के मुताबिक दंतेवाड़ा, सुकमा, बीजापुर, नारायणपुर, कांकेर, कोण्डागांव, बस्तर, सूरजपुर, सरगुजा, बलरामपुर, कोरिया, कोरबा अऊ जशपुर जिला म जिला पंचायत के अध्यक्ष के पद अनुसूचित जनजाति वर्ग बर आरक्षित होही। अनुसूचित जाति वर्ग बर बालोद, कबीरधाम अऊ धमतरी, आन पिछड़ा वर्ग बर राजनांदगांव, महासमुंद, बेमेतरा, जांजगीर-चांपा, रायगढ़, बलौदाबाजार-भाटापारा अऊ दुर्ग आरक्षित रहिही। रायपुर,मुंगेली, बिलासपुर अऊ गरियाबंद जिला म जिला पंचायत अध्यक्ष के पद अनारक्षित रहिही।
दंतेवाड़ा, नारायणपुर, सरगुजा, बलरामपुर, कोरिया, कोरबा अऊ जशपुर म जिला पंचायत अध्यक्ष के पद अनुसूचित जनजाति महिला मन बर आरक्षित करे गीस। अइसनहे अनुसूचित जाति महिला बर धमतरी अऊ कबीरधाम जिला ल आरक्षित करे गीस। आन पिछड़ा वर्ग महिला बर राजनांदगांव, बेमेतरा, महासमुंद अऊ दुर्ग जिला ल आरक्षित करे गीस। सामान्य वर्ग म महिला बर रायपुर, मुंगेली ल लॉटरी के माध्यम ले आरक्षित करे गीस।