युवा मन ह देखाइन अपन प्रतिभा के जौहर
जगदलपुर, जिला प्रशासन अऊ खेल अऊ युवा कल्याण विभाग कोति ले शासकीय शहीद गुण्डाधुर कृषि महाविद्यालय कुम्हरावण्ड जगदलपुर म 21 नवम्बर के जिला स्तरीय युवा उत्सव के भव्य अऊ रंगारंग कार्यक्रम के आयोजन करे गीस। ये दौरान जिला के सबो सात विकासखण्ड़ के युवा मन म रंगारंग सांस्कृति कार्यक्रम के अलावा तात्कालिक भाषण, निबंध, वाद विवाद, चित्रकला, व्यंजन अऊ क्रीड़ा आदि कई ठन प्रतियोगिता म अपन प्रतिभा के जौहर देखाइन। सांस्कृतिक विधा मन के अन्तर्गत युवा मन अपन उत्कृष्ट प्रस्तुति ले जनसमुदाय ल भाव विभोर कर दीन। कार्यक्रम के शुभारंम अवसर म पद्मश्री धर्मपाल सैनी, अपर कलेक्टर श्री अरविंद एक्का, सहायक आयुक्त आदिवासी विकास डॉ. आनंद सिंह अऊ आन अतिथि उपस्थित रहिन।
ये बेरा म सांस्कृति विधा मन के अन्तर्गत कत्थक, भरतनाट्यम एकल नृत्य, राक बैड, लोक गीत अऊ लोक नृत्य के अलावा तात्कालिक भाषण, निबंध, क्विज, वाद विवाद, चित्रकला, व्यंजन अऊ क्रीड़ा प्रतियोगिता होइस। ये आयोजन म जिला के सबो सात विकासखण्ड ले करीबन 800 कलाकार अऊ खिलाड़ी मन ह हिस्सा लीन। क्रीड़ा प्रतियोगिता के अन्तर्गत पुरूष वर्ग म विजेता के खिताब विकासखण्ड लोहण्डीगुड़ा ह हासिल करिन अऊ विकासखण्ड दरभा उप विजेता बनिस। कबड्डी बालिका वर्ग म विकासखण्ड तोकापाल विजेता अऊ विकासखण्ड लोहण्डीगुड़ा उप विजेता बनिस। खो-खो बालिका वर्ग म विकासखण्ड तोकापाल विजेता अऊ विकासखण्ड लोहण्डीगुड़ा उप विजेता बनिस। अइसनहे खो-खो बालक वर्ग म विजेता के खिताब विकासखण्ड लोहण्डीगुड़ा ह अऊ उप विजेता के खिताब विकासखण्ड बास्तानार ह हासिल करिस। क्विज प्रतियोगिता म पहिली स्थान विकासखण्ड जगदलपुर के बेनू बघेल अऊ सावन नेताम अऊ दूसर स्थान म लोहण्डीगुड़ा विकासखण्ड के रोहन कुमार, जगजीवन अऊ गोय रहिस। निबंध प्रतियोगिता म बस्तर विकासखण्ड के करन बघेल पहिली अऊ लोहण्डीगुड़ा विकासखण्ड कुमारी रेशमा अऊ बस्तर के कोराम दूसर स्थान म रहिस।