छत्तीसगढ़ के पढ़ई तुंहर दुआर ल मिलीस ई-गवर्नेंस अवार्ड

रायपुर, 13 फरवरी 2021। कोरोना संक्रमण अऊ लॉकडाउन के चलते स्कूली लइका मन ल घर बईठे ऑनलाइन शिक्षण सुविधा मुहैया कराए के उद्देश्य ले छत्तीसगढ़ सरकार कोति ले संचालित ’पढ़ई तुंहर दुआर’ कार्यक्रम ल न सिरिफ राष्ट्रीय स्तर म सराहे गीस भलुक ये अभिनव कार्यक्रम ल राष्ट्रीय स्तर म ई-गवर्नेंस अवार्ड घलोक मिले हे। ये अवार्ड आज उत्तरप्रदेश के राजधानी लखनऊ म उत्तरप्रदेश के मुख्यमंत्री श्री योगी आदित्यनाथ के उपस्थिति म उत्तर प्रदेश के राज्यमंत्री (स्वतंत्र प्रभार) स्टाम्प अऊ न्यायालय शुल्क, पंजीयन श्री रविन्द्र जायसवाल के हाथ देहे गीस। छत्तीसगढ़ राज्य कोति ले संचालक लोक शिक्षण अऊ प्रबंध संचालक पूरा शिक्षा श्री जितेन्द्र शुक्ला, सहायक संचालक पूरा शिक्षा डॉ. एम. सुधीश अऊ एन.आई.सी. के वैज्ञानिक श्रीमती ललिता वर्मा ह ये पुरस्कार ल झोंकिन। छत्तीसगढ शासन स्कूल शिक्षा विभाग के ये महत्वपूर्ण उपलब्धि म मुख्यमंत्री श्री भूपेश बघेल अऊ स्कूल शिक्षा मंत्री डॉ. प्रेमसाय सिंह टेकाम ह विभाग के प्रमुख सचिव डॉ. आलोक शुक्ला अऊ पूरा टीम ल बधाई देहे हें। मुख्यमंत्री श्री बघेल ह ये पुरस्कार ल छत्तीसगढ़ के सबो सक्रिय शिक्षक मन ल समर्पित करे हें जेमन एक उत्कृष्ट कोरोना वारियर के रूप म अपन महत्वपूर्ण भूमिका निभाए हें।