मुख्यमंत्री के संवेदनशील पहल: मस्कट म बंधक बनाय गए जोगी दीपिका सुरक्षित छत्तीसगढ़ लहुटिस

रायपुर, 10 फरवरी 2024। प्रदेश के संवेदनशील मुख्यमंत्री श्री विष्णु देव साय के पहल ले मस्कट म बंधक बनाय गए छत्तीसगढ़ के दुर्ग जिला के खुर्सीपार निवासी जोगी दीपिका मानव तस्कर मन ले बचके सुरक्षित छत्तीसगढ़ पहुंच गए हे। मुख्यमंत्री श्री साय ल जब ए प्रकरण के जानकारी उप मुख्यमंत्री श्री विजय शर्मा ले मिलीस त उमन उप मुख्यमंत्री श्री शर्मा ल जोगी दीपिका ल भारत वापस लाय बर हर संभव पहल करे के निर्देश दीन। छत्तीसगढ़ वापस आए के बाद जोगी दीपिका ह उप मुख्यमंत्री श्री शर्मा ले मुलाकात करके छत्तीसगढ़ सरकार के संवेदनशील पहल बर मुख्यमंत्री श्री साय, उप मुख्यमंत्री श्री शर्मा अऊ वैशाली नगर विधायक श्री रिकेश सेन के प्रति आभार जताइस।
मुख्यमंत्री के निर्देश म उप मुख्यमंत्री श्री विजय शर्मा ह मस्कट म बंधक बनाय गए जोगी दीपिका के मामला म ओमान स्थित इंडियन एम्बेसी ले संपर्क करके जोगी दीपिका के मदद के आग्रह करिन। उप मुख्यमंत्री सरलग इंडियन एम्बेसी के संपर्क म रहिन अऊ सरलग अपडेट लेत रहिन। ए दौरान उमन दूरभाष म मस्कट म जोगी दीपिका ले बातचीत करके ओ ल भरोसा देवाइन कि छत्तीसगढ़ सरकार ओ ल सुरक्षित वापस लाय बर सरलग उदीम करत हे। जल्दीच वोखर छत्तीसगढ़ सुरक्षित वापसी होही।
उप मुख्यमंत्री के लगातार प्रयास ले ओमान स्थित इंडियन एम्बेसी ह जल्दी कार्रवाई करिस, जेखर परिणाम स्वरूप दीपिका ल सुरक्षित एम्बेसी लाए गीस। ए प्रयास के ये सुखद परिणाम रहिस कि दीपिका सुरक्षित भारत पहुंचीस। छत्तीसगढ़ पहुंचके जोगी दीपिका सबले पहिली उपमुख्यमंत्री श्री विजय शर्मा ले मिले पहुँचीस अऊ ओ मन ल अपन आपबीती सुनाईस। जोगी दीपिका ह कहिस कि आप मन के मदद ले ही आज में अपन वतन सुरक्षित लहुट पाए हंव, नइ तो में उहां जीवन भर बंधक ही रही जातेंव। उमन मुख्यमंत्री श्री साय, उपमुख्यमंत्री श्री शर्मा अऊ विधायक श्री रिकेश सेन के प्रति आभार प्रकट करीस।
जानबा हे कि दुर्ग जिला के निवासी जे. मुकेश ह पुलिस ल आवेदन दे रहिस कि वोखर पत्नी जोगी दीपिका ल घरेलू काम देवाए के बहाना हैदराबाद निवासी अब्दुल्ला ह ओमान देश के राजधानी मस्कट निवासी हाफिजा के घर पउर साल मई 2023 म भेजे रहिस, जहां जोगी दीपिका ल बंधक बनाके रखे गए रहिस। दीपिका के पासपोर्ट, वीजा संबंधित सब्बो दस्तावेज़ घलोक रख लेहे गए रहिस। ओला भारत वापस भेजे खातिर रकम के घलोक मांग करे जात रहिस।
ये विसय जइसेच उपमुख्यमंत्री श्री शर्मा के संज्ञान म आइस। उमन पुलिस ल जरूरी कार्रवाई करे के निर्देश दीन। मस्कट म मानव तस्कर मन के चंगुल ले बचके भारत पहुंचे जोगी दीपिका ह वैशालीनगर विधायक रिकेश सेन के संग उपमुख्यमंत्री विजय शर्मा ले मिलके अपन आपबीती सुनाईस अउ ऊंखर पहल अउ मदद बर आभार जताइस।