रायपुर, 02 अप्रैल 2020। वन विभाग के अंतर्गत गठित संयुक्त वन प्रबंधन समिति मन के महिला मन घलोक अब कोरोना महामारी के सेती पैदा होए ये विषम हालत म सहायता बर आगू आए हें। इमन अभी हाल म मनखे मन ल मदद पहुंचाए खातिर सरलग मास्क बनावत हें। मानवीता के ये सुग्घर उदाहरन वनांचल क्षेत्र फरसगांव वन परिक्षेत्र के पतोड़ा अऊ बड़ेडोंगर वन परिक्षेत्र के मांझीआठ गांव के संयुक्त वन प्रबंधन समिति के महिला मन म देखे जा सकत हे।
प्रधान मुख्य वन संरक्षक श्री राकेश चतुर्वेदी के बताती केशकाल वन मण्डल के अंतर्गत ए समिति मन के 14 महिला मन अब तक 5 हजार ले जादा मास्क के निर्माण कर लेहे हें। श्री चतुर्वेदी ह एहू बताइन के संयुक्त वन प्रबंधन समिति के महिला मन ल मास्क बनाए के काम म कोनो दिक्कत झन होवय, एखर खातिर वन विभाग कोति ले ओ मन ल जरूरी सामान उपलब्ध कराए गए हे। कोरोना वायरस संक्रमण के माहौल म हर जगा लॉकडाउन के परिस्थिति बने हे। ए परिस्थिति मन म वन अऊ वनवर्धनिक काम करे बर वन विभाग के अधीनस्थ कर्मचारी मन ल घलोक समिति मन के महिला मन के बनाए मास्क उपलब्ध कराए जात हे। एखर अलावा विभाग कोति ले वन-धन योजना के तहत संचालित होवत 208 स्व-सहायता समूह मन के जम्मो सक्रिय सदस्य मन दू हजार 80 मनखे मन ल मास्क के वितरण करे जात हे। जेखर से ओ मन ल सोशल डिस्टेंसिंग के संगें-संग लघु वनोपज कार्य संग्रहण अऊ प्रसंस्करण काम करे बर कोनो परेशानी झन होवय।