रायपुर, एशिया के सबले बड़े (मानव निर्मित) जंगल सफारी अब देश-विदेश म प्रसिद्ध होवत हे। अटल नगर नवा रायपुर स्थित ये जंगल सफारी छत्तीसगढ़ म अवइया सैलानी मन बर प्रमुख आकर्षण हे। रायपुर शहर ले करीबन 25 किलोमीटर दूरी म स्थित ये जंगल सफारी देश के सबले खुबसूरत जंगल सफारी मन म ले एक हे। ये सफारी करीबन 320 हेक्टेयर क्षेत्र म फैले हे। सैलानी मन के ठहरे अऊ रिफरेशमेंट बर जंगल सफारी के तीर-तखार म पर्यटन अऊ वन विभाग कोति ले मोटल अऊ रिसार्ट जइसे उच्च स्तरीय सुविधा विकसित करे गए हे।
जंगल सफारी म इहां राष्ट्रीय पशु रॉयल बंगाल टायगर के प्रजाति बर एक अलग ले जोन बनाए गए हे। इहां प्राकृतिक घर म बाघ मन ल स्वछंद रूप ले विचरण करत देखे जा सकत हे। बाघ मन के प्राकृतिक रहवास बर इहां 1945 वर्ग मीटर क्षेत्र म छायादार पौधा लगाए गे हे। बाघ मन ल देखे बर सैलानी मन बर इहां दर्शक ओसारी बनाय गए हे। बाघ मन ल प्राकृतिक घर केन्द्रीय चिड़िया घर नई दिल्ली के नार्म्स के मुताबिक तियार करे गए हे। इहां शेर मन बर 2550 वर्ग मीटर म रहवास बनाए गए हे। शेर मन बर गुफा के निर्माण करे गए हे।
जंगल सफारी म टफन ग्लास के चैम्बर म तेंदूवा मन ल देखे जा सकत हे। इहां विश्व प्रसिद्ध सफेद शेर बर अलग ले इन्क्लोजर बनाय गे हे। हिमालयन भालू ल झरना म नहात देखे जा सकत हे। रंग-बिरंगी कछुवा के प्रजाति घलोक लइका मन बर इहां आकर्षण के केन्द्र हे। पानी म रहइया दरियाई घोड़ा मन इहां बनाय गे तालाब मन म विचरण करत देखे जा सकत हे। अपन तीखा दांत मन बर पहचाने जाने वाला घड़ियाल घलोक इहां देखे जा सकत हे। एखर अलावा इहां अऊ घलोक बहुत कुछ देखे लायक जंगली जानवर हे। इहां बंगाल के बड़का लिर्जाड (गोइहा) उदबिलाव, मगरमच्छ संग कई ठन क्षेत्र मन ले आए पशु-पक्षी इहां अवइया सैलानी मन के मन ल मोह लेथें।
मुख्यमंत्री श्री भूपेश बघेल के अध्यक्षता म हाले म आयोजित कैबिनेट बैठक म वन मंत्री श्री मोहम्मद अकबर के प्रस्ताव म छत्तीसगढ़ के सैलानी मन अऊ स्कूली लइका मन के संगें-संग देश भर के पर्यटक मन ल आकर्षित करे बर जंगल सफारी के प्रवेश शुल्क आधा करे के निर्णय ले गए हे। राज्य अऊ देशभर के पर्यटक मन के सुविधा बर ऑनलाईन टिकट www.junglesafari.cg.nic.in के सुविधा घलोक चालू करे गए हे। पर्यटक मन के सुविधा के दृष्टिकोण ले सफारी अऊ जू म आकर्षक प्रवेश द्वार के तीरेच टिकट काउंटर अऊ पार्किंग स्थल बनाय गए हे। ये मां करीबन 1000 वाहन मन ल एक संग पार्क करे जा सकत हे। पर्यटक मन के भ्रमण के समय सुविधा बर जरूरी प्रसाधन व्यवस्था अऊ कई ठन सफारी म वाटर एटीएम घलोक लगाए गए हे। संगेच लैण्डस्केप के क्षेत्र म 12 पगोड़ा घलोक पर्यटक मन के थिरावन बर स्थापित करे गए हे। ए चिड़ियाघर प्रक्षेत्र म कुल 37 बाड़ा मन के निर्माण करे जाना हे। जेमा ले 11 बाड़ा के निर्माण पूरा करे जा चुके हे। एखर अलावा जंगल सफारी म इंटरप्रिटेशन सेंटर, एम्फी थियेटर, मिनी थियेटर, डायरेक्टर कार्यालय भवन, कैफेटेरिया, डार्मेटरी अऊ शॉपिंग कॉम्पलेक्स आदि के स्थापना के काम घलोक करे जाही।
जंगल सफारी ल अऊ जादा उपयोगी अऊ ज्ञानवर्द्धक बनाए बर इहां वनस्पतिक उद्यान विकसित करे जावत हे। एखर से इहां जैव विविधता के संरक्षण होही उन्हें प्रकृति प्रेमी मन अऊ विज्ञान के पढ़ईया लईका मन ल ज्ञानवर्द्धक जानकारी मिलही। जंगल सफारी के ये अलौकिक अऊ स्वच्छ अऊ हरा-भरा आच्छादित क्षेत्र म करीबन 70 प्रजाती मन के पेड़-पौधे, 12 कई ठन प्रजाति मन के वन्य प्राणी संग 76 कई ठन प्रजाति मन के प्रवासी पक्षी जैव विविधता म अपन विशिष्ट स्थान रखथें।