15 नवम्बर 2024 शुकवार, रायपुर।
जनजातीय गौरव दिवस के जिला स्तरीय कार्यक्रम आज वनांचल नगरी विकासखण्ड के ग्राम सांकरा म आयोजित करे गिस। राजस्व मंत्री श्री टंकराम वर्मा ह बतौर मुख्य अतिथि कहीन कि हमन ल भगवान बिरसा मुंडा के जीवन ले प्रेरणा मिलथे कि हम कतेक दिन जीथन, कतेक बछर जीथन, मायने नइ रखय, हम अपन जिनगी ल कइसे जीथन, येह मायने रखथे। भगवान बिरसा मुंडा ह केवल 25 बछर के उम्मर म ही अपन जिनगी ल देषहित म बलिदान कर दीन। उन मन मातृभूमि के रक्षा, जल, जंगल अउ जमीन बर करीन। अइसन महान पुरुष के जीवन ले प्रेरणा लेके हम समाज, देश ल संगठित करके आगू ले जा सकथन।
मंत्री श्री वर्मा ह कृषि विभाग कोति ले 15 झिन हितग्राही मन ल मसूर मिनीकिट वितरण, 9 झिन हितग्राही मन ल स्प्रेयर पंप वितरण, पशु चिकित्सा विभाग कोति ले 8 झिन हितग्राही मन ल चेक वितरण, चिकित्सा एवं स्वास्थ्य विभाग कोति ले 10 झिन हितग्राही मन ल पोषण कीट के वितरण, श्रम विभाग कोति ले 4 झिन हितग्राही मन ल राशि वितरित करीन।
मंत्री श्री टंकराम वर्मा ह भगवान बिरसा मुंडा के 150 वीं जयंती के अवसर म आदिवासी समाज सहित सबो झिन ल बधाई देवत कहीन कि प्रधानमंत्री श्री नरेन्द्र मोदी अउ मुख्यमंत्री श्री विष्णु देव साय के पहल म जनजातीय गौरव दिवस मनाए जावत हवय। एकर ले जनजातीय समुदाय ल जागृत करे जावत हावय। उन मन कहीन कि जनजातीय वीर मन के छत्तीसगढ़ म बहुते बड़का योगदान हवय। जब कभू हमन आदिवासी के बात करथन, त सबले पहिली भाव इही उठथे, कि आदिवासी बहुतेच सहज, सरल अउ उदार मनखे अउ प्रकृति प्रेमी होथय। जनजाति जीवन शैली म भारत दर्शन अउ सनातन के मूल्य गूंजथे। उन आगू कहीन कि मोला ये काहत बहुते गर्व होथे कि हमार आदिवासी समाज अनादि काल ले आज तक अपन सादगी बर जाने जाथे। ओतकेच अपन अस्मिता ल बचाए अउ अपन मान अउ सम्मान बर संघर्ष बर तको जागरूक होथे। ये बेरा म उन मन आने आने विभाग मन के स्टॉल मन के अवलोकन तको करीन।
उन मन आगू कहीन कि हमन ल आदिवासी मुख्यमंत्री श्री विष्णु देव साय के रूप में मिले हावय। प्रदेश म हम जनजातीय समुदाय ल ऊपर उठाए बर प्रतिबद्ध हवन। श्री वर्मा ह कहीन कि प्रधानमंत्री द्वारा पीएम जनमन योजना लागू कर विशेष पिछड़ी जनजाति ल राष्ट्र के मुख्यधारा से जोड़े के उदीम करे जावत हावय। एकर तहत इन वर्ग मन ल आवास, शिक्षा, आत्मनिर्भरता बर कौशल विकास, स्व-रोजगार संबंधी अबड़ अकन योजना संचालित करे जावत हावय। प्रभारी मंत्री ह कहीन कि प्रधानमंत्री श्री नरेन्द्र मोदी ह भगवान बिरसा मुंडा के जयंती के जनजातीय गौरव दिवस के रूप म मनाके उन मन ल संगठित करे के उदीम करे हावयं।
ये बेरा म पूर्व सिहावा विधायक श्रीमती पिंकी शिवराज शाह अउ सर्व आदिवासी समाज के तहसील अध्यक्ष श्री उमेश देव ह तको कार्यक्रम ल संबोधित करीन।