बिलासपुर, मैं खुद ल सौभाग्यशाली मानथंव कि मोला छत्तीसगढ़ हाईकोर्ट म ही जज के जवाबदारी मिलीस। भगवान के असीस ये जेन मोला ये अवसर मिलीस। ये बात सोमवार के छत्तीसगढ़ हाई कोर्ट म अकतहा जज के रूप म कार्यभार ग्रहण करे के बाद अपन सम्मान म होए ओवेशन ल संबोधित करत जस्टिस सचिन सिंह राजपूत ह कहिन। उमन सुप्रीम कोर्ट कालेजियम अऊ चीफ जस्टिस एके गोस्वामी के आभार जतात कहिन कि ये राज्य के आम मनखे मन ल न्याय समय म मिल सकय एखर खातिर मैं अपन कोति ले कोनो कसर नइ छोड़व। उमन कहिन कि मोला पिता जेकेएस सिंह समेत पूरा परिवार ह सरलग प्रेरित करिन। इंकर बिना ये संभव नइ रहिस। जस्टिस राजपूत ह बताइस कि अपन सीनियर स्व. विजय सिंह ह ओ मन ल बहुत कुछ सिखाइन। पहिली ऊंखर सीनियर रहे अभी हाल म हाई कोर्ट के सीनियर जस्टिस गौतम भादुड़ी ह घलोक कानून के बारीकी बताईन। गुरुजन मन अऊ सीनियर मन ह ही मोला ये काबिल बनाइन।
कार्यक्रम म पहिली जस्टिस राजपूत ल चीफ जस्टिस ह पद के शपथ देवाइन। रजिस्ट्रार जनरल अरविंद कुमार वर्मा ह राष्ट्रपति कर्यालय ले भेजे गए वारंट ल पढ़के सुनाइन। ये दौरान महाधिवक्ता सतीशचन्द्र वर्मा, हाई कोर्ट बार एसोसिएशन के अध्यक्ष अब्दुल वहाब अऊ केंद्र शासन के अकतहा सोलिसिटर जनरल रमाकांत मिश्रा ह घलोक कार्यभार लेहे म स्वागत करत जस्टिस राजपूत के जीवन परिचय प्रस्तुत करिन।
जस्टिस सचिन सिंह राजपूत: मैं खुद ल सौभाग्यशाली मानथंव, छत्तीसगढ़ हाईकोर्ट म ही जवाबदारी मिलीस
