मुख्यमंत्री श्री भूपेश बघेल ह प्रदेश म जुआ-सट्टा के नवा रूप उपर रोक लगाय के दीन हुकुम

रायपुर, प्रदेश म जुआ अऊ सट्टा जइसे सामाजिक बुराई ल खतम करे बर मुख्यमंत्री श्री भूपेश बघेल ह पुलिस महानिदेशक श्री अशोक जुनेजा ल कड़क कदम उठाए के निर्देश देहे हें। मुख्यमंत्री ह प्रदेश म जुआ-सट्टा के विविध स्वरूप अऊ प्लेटफार्म मन उपर प्रभावी रोक लगाय खातिर कड़क कदम उठाए बर जरूरी प्रावधान अऊ प्रक्रिया मन के प्रारूप बनाए के निर्देश तको देहे हें जेखर आधार म जुआ सट्टा के रोकथाम बर कड़ा कानून बनाए जा सकही।
छत्तीसगढ़ सरकार जुआ अऊ सट्टा के सामाजिक बुराई ल लेके पहिलिच बहुत सख़्त हे, ये म कठोर नियंत्रण बर स्पष्ट निर्देश घलोक देहे गए हे। राज्य के पुलिस जुआ अऊ सट्टा ल रोके के दिशा म सरलग कार्रवाई करत हे। कार्रवाई ले बचे बर जुआ सट्टा के अवैध कारोबार म सामिल मनखे मन तकनीक के सहारा लेके कई प्रकार ले ऑनलाईन जुआ सट्टा कारोबार करे लगे हें, ऑनलाइन चलइया ये कारोबार सरलग बाढ़ता जात हे।
ऑनलाइन संचालित होवत जुआ अऊ सट्टा के विरुद्ध कोनो विधिक प्रावधान अउ स्पष्ट कार्रवाई के प्रकिया नइ होए ले ए म प्रभावी रूप ले रोक नइ लगाए जा पात हे, ये दिशा म कड़क कार्रवाई हो सकय ते पाए के जुआ अऊ सट्टा उपर प्रभावी रोक लगाय बर मुख्यमंत्री श्री बघेल ह जरूरी विधिक प्रावधान अऊ प्रक्रिया मन के प्रारूप जल्दी तियार करे के निर्देश देहे हें।