75 हजार रूपिया के मिलीस पुरूस्कार, कलेक्टर श्रीमती कौशल ह करिस सम्मानित
कोरबा, कोरबा के युवा कबड्डी खिलाड़ी कुमारी विद्या जिप्सी ल राज्य शासन कोति ले राज्य खेल अलंकरण के तहत् पुरस्कृत करे गए हे। कलेक्टर श्रीमती किरण कौशल ह आज कलेक्टोरेट सभाकक्ष म कुमारी विद्या ल राज्य शासन के तरफ ले अलंकरण स्वरूप प्रशस्ति पत्र अऊ 75 हजार रूपिया के पुरूस्कार राशि के धनादेश देके सम्मानित करिस। कुमारी विद्या जिप्सी शासकीय विद्युत गृह उच्चतर माध्यमिक विद्यालय नंबर 2 के कक्षा 10वीं के छात्रा हे। विद्या राष्ट्रीय खेल मन के तहत् खेलो इण्डिया कार्यक्रम म महाराष्ट्र के पुणे म आयोजित प्रतियोगिता म छत्तीसगढ़ के तरफ ले अण्डर 17 कन्या वर्ग म कबड्डी खेल के उपविजेता टीम के सदस्य रहे हे। छत्तीसगढ़ के टीम ह ये खेल म रजत पदक पाए रहिस। विद्या ल कबड्डी खेल म ओखर उत्कृष्ट प्रदर्शन बर सरकार कोति ले पुरस्कृत करे गए हे।
