मुख्यमंत्री सोनपैरी म आयोजित कबीर जयंती समारोह अउ गौ ग्राम जन जागरण यात्रा के समापन कार्यक्रम म संघरिन

संत कबीर ह अपन उपदेश मन ले समाज ल नवा रद्दा देखाईन : श्री साय
प्रदेश म गौशाला के नाम ‘गौधाम’ करे के घोषणा
रायपुर, मुख्यमंत्री श्री विष्णुदेव साय काली अभनपुर विकासखंड के सोनपैरी गांव म आयोजित कबीर जयंती महोत्सव अउ गौ ग्राम जन जागरण यात्रा के समापन समारोह म संघरिन। उमन सकलाए मनखे मन ल कबीर जयंती के शुभकामना दीन। ए बेरा म मुख्यमंत्री श्री साय ह गुरुकुल भवन बर 20 लाख रूपिया, प्रदेश म गौशाला के नाम ‘गौधाम’ करे अउ सोनपैरी स्कूल म बाउंड्री वाल निर्माण के घोषणा करिन। संगेच सामुदायिक भवन निर्माण, भुताही पारा ले आश्रम तक नाली निर्माण अउ सोनपैरी ले खिलोरा मुख्य मार्ग ले आश्रम तक सीसी रोड निर्माण काम के भूमिपूजन करिन।
मुख्यमंत्री श्री साय ह कहिन के हमर छत्तीसगढ़ के भुइंया धन्य हे, जेमां कबीर साहेब जी के वाणी के गहरा प्रभाव रहे हे। संत कबीर हमेशा जीव दया के उपदेश देवत रहिन। प्रदेश के संस्कार के निर्माण म न केवल कबीरपंथ के अनुयायी मन के योगदान हे, भलुक वो मनखे मन के घलोक, जिंकर जीवन म कबीर साहेब जी के निर्मल वाणी ह गहरा असर डाले हे। उमन कहिन के कबीर साहेब ह अपन पूरा जीवन जनजागरण ल समर्पित करे हें। उमन अपन उपदेश मन ले समाज ल यरलग सही राद्दा देखाए हें। कबीर जी अपन दोहा मन म जनजागरण के बात करत रहिन अऊ ये मानत रहिन के जीवन बहुत अमूल्य हे अउ एकर सार्थक उपयोग करना चाही।
मुख्यमंत्री श्री साय ह अपन संबोधन म संत कबीर के मानवतावादी विचार ल आज के समय म घलोक प्रासंगिक बताइन अऊ गौसेवा अउ सामाजिक एकता उपर बल दीन। उमन गौ ग्राम जनजागरण रैली म सामिल गौशाला मन के प्रतिनिधि मन ल शुभकामना दीन अऊ कहिन के ये एक बहुत सार्थक प्रयास हे। श्री साय ह कहिन के गौ-अभयारण्य के स्थापना बर जमीन के चिन्‍हारी करे जात हे।
ए बेरा म विधानसभा अध्यक्ष डॉ. रमन सिंह ह कहिन के छत्तीसगढ़ देश म चावल उत्पादन, स्टील, सीमेंट, एल्युमिनियम अऊ बिजली अउ कोयला आपूर्ति के क्षेत्र म अग्रणी राज्य के रूप म जाने जात हे। डॉ. सिंह ह कहिन के अवइया समय म मुख्यमंत्री श्री साय के अगुवइ म छत्तीसगढ़ देश के अग्रणी राज्य मन म सामिल होही।
कैबिनेट मंत्री श्री ओ.पी. चौधरी ह कहिन के कबीर, तुलसीदास जइसन संत मन ह समाज ल नवा दिशा देखाए हें। हम आर्थिक रूप ले चाहे कतकोन प्रगति कर लेवन फेर समाज ल दिशा अऊ मूल्य संत परंपरा ही दे सकत हे। श्री चौधरी ह कहिन के कबीर के विचार ह समाज ल नवा दिशा देहे हे अऊ आज के भौतिकवादी युग म घलोक ऊंखर विचार वोतकेच प्रासंगिक हे।
कबीरपंथी जगतगुरु श्री असंग देव जी ह कबीर साहेब के वाणी मन के महत्व उपर प्रकाश डालिन। समारोह म केंद्रीय राज्यमंत्री श्री तोखन साहू, गोसेवा आयोग अध्यक्ष श्री बिसेसर पटेल, अभनपुर विधायक श्री इंद्रकुमार साहू, विधायक श्री किरण देव संग आन गणमान्य नागरिक उपस्थित रहिन।