उपमुख्यमत्री श्री विजय शर्मा ह शैक्षणिक भरमण बर बस ला देखाइन हरियर झंडी
मुख्यमत्री श्री साय सरकार ह गाँव के महिला मन अउ पशुपालक मन ला आत्मनिर्भर बनाय बर सरलग कोसिस करत हे – उपमुख्यमत्री श्री विजय शर्मा
कवर्धा, उपमुख्यमत्री श्री विजय शर्मा ह कसली कवर्धा के समनापुर पुल करा ले डेयरी कोऑपरेटिव अउ अमूल डेयरी कोऑपरेटिव बनासकाठा गुजरात के शैक्षणिक भ्रमण म जाय वाला पशुपालक मन अउ बिहान के दीदी मन के बस ला हरियर झंडी देखा के रवाना करिन। ए मौका म ओमन बस के भितरी जाके बिहान समूह के दीदी मन अउ पशुपालक मन ले मयारू गोठ-बात करिन अउ भरमण के मतलब अउ उंखर ले सीखे के बारे म चर्चा करिन।
उपमुख्यमत्री श्री शर्मा ह जम्मो झन ला सुभकामना देवत कहिन के ओमन बनासकाठा जाके उहाँ के उन्नत व्यवस्था मन ला ध्यान ले देखंय, समझंय अउ सीखंय। ए भ्रमण ह सिरिफ देखे के कार्यक्रम नोहे, बल्कि सीखे अउ ओला अपन इहाँ लागू करे के मौका आय। ओमन कहिन के उहाँ के सफल डेयरी मॉडल, प्रबंधन के तरीका अउ तकनीकी नवाचार मन के गहराई ले अध्ययन करंय, ताकि जिला म दूध के उत्पादन अउ रोजी-रोटी के क्षेत्र म बने बदलाव लाय म मदद मिल सकय।
उपमुख्यमत्री श्री विजय शर्मा ह बताइन के ए शैक्षणिक भ्रमण ले प्रतिभागी मन ला उन्नत पशुपालन तकनीक, संतुलित चारा विकास, डेयरी कोऑपरेटिव के सोच, दूध के संकलन अउ ओला सुरक्षित रखे के तरीका, क्वालिटी कंट्रोल अउ डेयरी सामान बनाय के संग बजार व्यवस्था के बारे म जानकारी मिलिही। संग म ओमन ला ए घलो समझे के मौका मिलिही के कइसे सहकारी मॉडल के माध्यम ले गाँव के अर्थव्यवस्था ला मजबूत करे जा सकत हे।
जानबा हे के उपमुख्यमत्री अउ कवर्धा विधायक श्री विजय शर्मा के खास कोसिस ले कबीरधाम जिला के 17 बिहान समूह (एनआरएलएम) के दीदी मन अउ 17 पशुपालक ए शैक्षणिक भरमण म सामिल होत हें। ए दल ह गुजरात के बनासकाठा डेयरी कोऑपरेटिव अउ अमूल डेयरी कोऑपरेटिव ला देखही, जे ह देश-प्रदेश म अपन बढ़िया दूध उत्पादन अउ सहकारी मॉडल बर प्रसिद्ध हे। उपमुख्यमत्री श्री विजय शर्मा ह कहिन के मुख्यमत्री श्री विष्णुदेव साय सरकार ह गाँव के महिला मन अउ पशुपालक मन ला आत्मनिर्भर बनाय बर सरलग काम करत हे। बिहान समूह के माध्यम ले महिला मन ला जोड़ के आर्थिक काम-काज ले जोड़े जात हे, उहें पशुपालन विभाग डहर ले दूध उत्पादन बढ़ाय अउ पशुपालक मन के कमाई म बढ़ोत्तरी बर कतकोन योजना मन चलाये जात हे।
ए मौका म जिला पंचायत अध्यक्ष श्री ईश्वरी साहू, उपाध्यक्ष श्री कैलाश चंद्रवंशी, नगर पालिका अध्यक्ष श्री चंद्रप्रकाश चंद्रवंशी संग कतकोन जनप्रतिनिधि अउ अधिकारी मन उपस्थित रहिन।