समर्थन मूल्य म धान खरीदी कर जिला पहुंचिस प्रदेश म टॉप, अब तक 88 हजार 690 किसान मन ले 614 करोड़ रूपिया के होइस धान खरीदी

कवर्धा, 13 जनवरी 2021। पूरा प्रदेश म कबीरधाम जिला खरीफ विपणन साल 2020-21 म समर्थन मूल्य म किसान मन ले शांतिपूर्ण अऊ सुचारू रूप ले धान खरीदी करे के मामला सरलग टॉप म अपन जगा बनाएच हे। जिला म धान खरीदी के शुरूआत ले लेके अब तक 88 प्रतिशत किसान मन ले समर्थन मूल्य म धान खरीदी कर लेहे गए हे। कबीरधाम जिला म धान उपार्जन बर खरीफ विपणन साल 2020-21 म जिला के कुल 1 लाख 385 किसान मन ह धान बेचे बर पंजीयन कराए हें। जेखर कुल पंजीकृत रकबा 1 लाख 8 हजार 764 हेक्टेयर हे। धान खरीदी ले शुरूआत ले लेके अब तक (11 जनवरी के स्थिति म) जिला के 88 हजार 690 किसान मन ह समर्थन मूल्य म 3267940 कुंवटल धान बेच डरे हें। ये लिहाज ले जिला मे अब तक पंजीकृत रकबा म ले 88 हजार हेक्टयर के धान किसान मन ले समर्थन मूल्य म खरीदी कर लेहे गए हे। किसान मन जऊन घान बेचे हें तेकर कुल मूल्य 614 करोड़ रूपिया हे। प्रदेश म किसान मन के पंजीकृत रकबा म ले सबले जादा रकबा प्रतिशत के धान के क्रय करके कबीरधाम पहिली स्थान म हे। कलेक्टर श्री रमेश कुमार शर्मा ह कहिन के जिला के पंजीकृत किसान भाई, धान खरीदी के मामला म फैलाए जात कोनो प्रकार के भ्रम म झन आवय। जिला के सबो पंजीकृत किसान मन ले धान के खरीदी करे जाही।
कबीरधाम जिला म 2.5 एकड़ तक के पंजीकृत कृषक 64090 हें। जेमां ले 55469 किसान एक पईत म ही समिति म अपन जम्‍मो धान विक्रय कर डरे हें। ओ मन ल धान विक्रय बर दुबारा समिति आए के जरूरत नइ परय। जिला म 2.5 एकड़ ले 5 एकड़ जमीन वाले 24878 पंजीकृत किसान मन म ले 22700 किसान धान विक्रय करे हें। ये प्रकार जिला म 5 एकड़ तक जमीन धारण करइया कुल पंजीकृत 88968 लघु/सीमांत कृषक मन म ले 78169 किसान अपन धान विक्रय कर डरे हें, जऊन कुल लघु कृषक मन के 88 प्रतिशत होथे। 5 एकड़ ले जादा जमीन धारण करइया मध्यम/दीर्घ पंजीकृत किसान 11743 म ले 10521 किसान अपन धान के विक्रय कर डरे हें।ये साल जिला म 16682 किसान मन 11325 हैक्टेयर जमीन के धान विक्रय बर नवा पंजीयन कराए हें। जिला म कुल पंजीकृत कृषक मन म ले 4477 किसान मन एक बार ले जादा धान विक्रय करे हें।