पीएम सूर्यघर योजना के प्रति मनखे मन म दिखत हे उछाह

ग्राम दौजरी के श्री रितेश चंद्रवंशी के घर के छत म लगिस सोलर पैनल 
बिजली बिल ले राहत, होवत हे अकतहा अमदानी
कबीरधाम, प्रधानमंत्री सूर्यघर मुफ्त बिजली योजना ह कबीरधाम जिला के दौजरी गाँव म एक नवा क्रांति ला देहे हे। ये योजना अब केवल शहरी भर न ही, बल्कि ग्रामीण अंचल मन म घलोक मनखे मन ल ऊर्जा के क्षेत्र म आत्मनिर्भर बने के अवसर देवत हे। गाँव-गाँव म मनखे अपन छत म सोलर पैनल लगाके बिजली बिल ले राहत पावत हें, संगेच पर्यावरण संरक्षण के अभियान म अपन भूमिका अदा करत हें।
ये बदलाव के एक जीता-जागता मिसाल हे दौजरी गाँव के रहवइया श्री रितेश चंद्रवंशी। वो ह बिना देर करे प्रधानमंत्री सूर्यघर योजना के लाभ लीस अऊ अपन घर के छत म सोलर पैनल स्थापित कराइस। सौर ऊर्जा ले वोखर घर के बिजली के ज़रूरत अब पूरा होवत हे, जेखर से ओ ल हर महीना होवइया 2000 ले जादा के बिजली बिल के बचत होवत हे। वोखर बर ये योजना सिर्फ़ बचत के साधन भर नो हे, भलुक एक स्थायी समाधान बन गए हे। रितेश ह बताइस के ओ ल केंद्र सरकार ले 78,000 अऊ राज्य सरकार ले 30,000 के सब्सिडी मिले हे, जेखर से सोलर सिसटम लगवाना किफायती अऊ आसान हो गए हे। ओ कहिस के अब न तो बिजली बिल के चिंता हे, न बिजली कटे के परेशानी। उल्टा सूरज के रोशनी ले आमदनी होवत हे। सरकार के ये कदम गांव के मनखे मन खातिर वरदान साबित होवत हे। मुख्यमंत्री श्री विष्णुदेव साय के दूरदृष्टि अऊ शासन के प्राथमिकता म सामिल ऊर्जा आत्मनिर्भरता के ये पहल ग्रामीण अंचल म नवा चेतना फैलावत हे। ए योजना के तहत उपभोक्ता मन के खपत के मुताबिक 45,000 ले 1,08,000 तक के सब्सिडी देहे जात हे, जेखर से 1 ले 3 किलोवाट के सोलर सिसटम अब मध्यमवर्गीय अऊ नीचले आय वर्ग के परिवार मन के पहुंच म हे।
रितेश ह बताइस के पहिली हर महीना बिजली बिल के बोझा दिमाग म रहत रहिस, फेर अब सौर ऊर्जा ले हमला आर्थिक राहत मिले हे, संगेच ये जानके खुशी होत हे के हम पर्यावरण संरक्षण म घलोक सहयोग देवत हन। श्री रितेश के ये पहल अब पूरा गाँव खातिर एक प्रेरणास्रोत बन गए हे। वोखर सफलता ल देखके दौजरी अऊ आसपास के क्षेत्र मन के कई मनखे घलोक अब ए योजना के तहत सोलर पैनल लगवाए खातिर आगू आवत हें।