कबीरधाम, 8 जुलाई, 2024। उपमुख्यमंत्री श्री विजय शर्मा ह अपन कबीरधाम दउरा के बेरा म आज कई ठन कार्यक्रम म भाग लेके विकास काम मन के लोकार्पण करिन। उपमुख्यमंत्री श्री शर्मा ह विधायक कार्यालय म क्षेत्र के कई ठन मनखे मन ले मुलाकात तको करिन। उमन मनखे मन के समस्या अऊ मांग ल सुनके ऊंखर निराकरण के निर्देश संबंधित मन ल दीन। श्री शर्मा ह कहिन कि जनता के समस्या मन के समाधान पहली प्राथमिकता हे अऊ उंखर प्रयास हे कि मनखे मन ल कोनो परेशानी के सामना झन करना परय।
उपमुख्यमंत्री श्री विजय शर्मा ह बोड़ला म 48 लाख 42 हजार के लागत ले निर्मित कस्तूरबा गांधी बालिका आवासीय विद्यालय बर 6 अकतहा कक्ष के लोकार्पण करिन। उपमुख्यमंत्री ह कहिन कि ये विद्यालय क्षेत्र के बेटी मन ल गुणवत्तापूर्ण शिक्षा प्रदान करही अऊ ओ मन ल आत्मनिर्भर अउ सशक्त बनाही। एखर बाद उपमुख्यमंत्री श्री शर्मा ह ग्राम खरहट्टा म 11 लाख 48 हजार रुपिया के लागत ले निर्मित प्राथमिक शाला भवन के लोकार्पण करिन। उमन पढ़ईया लईका मन अऊ शिक्षक मन ल नवा भवन के बधाई अउ शुभकामना दीन। ए बेरा म ग्रामवासी मन ह बेहतर शैक्षणिक प्रबंधन बर उपमुख्यमंत्री के आभार व्यक्त करिन।
