- राष्ट्रपति ह मुलाकात के बेरा खींचे फोटू ट्विटर म घलोक करिन शेयर
- छत्तीसगढ़ के झांकी के फोटू घलोक राष्ट्रपति के सोशल मीडिया अकॉउंट म होइस पोस्ट: झांकी ल पूरा देश ले जमके मिलीस सराहना
रायपुर, 28 जनवरी 2020। राष्ट्रपति भवन म राष्ट्रपति श्री रामनाथ कोविंद ह देश के आने-आने राज्य ले आए आदिवासी कलाकार अऊ लोक कलाकार मन ले मुलाकात करिन। ये बेरा म उमन छत्तीसगढ़ ले आए लोक कलाकार मन के दल ले घलोक मुलाकात करिन। राष्ट्रपति श्री कोविंद ह मुलाकात के बेरा खींचे गए फोटू ल ट्विटर म घलोक पोस्ट करे हें। 26 जनवरी के दिन राजपथ म निकले छत्तीसगढ़ के झांकी के फोटू ल राष्ट्रपति के फेसबुक अऊ ट्विटर अकॉउंट म घलोक पोस्ट करे गए रहिस। ये झांकी ल नेशनल मीडिया संग पूरा देश ले मनखे मन के जमकर तारीफ मिले हे।
हम आप ल बता देवन के गणतंत्र दिवस के मौका म राजपथ म निकलइया परेड बर देश के आने-आने राज्य के झांकी मन के चयन करे गए रहिस, जेमां छत्तीसगढ़ के झांकी ह राजपथ म झांकी मन के अगुवाई करे रहिस। छत्तीसगढ़ के झांकी के संग नारायणपुर जिला के अबूझमाड़ के कलाकार मन के दल ह ककसार नृत्य अऊ लोक गीत के शानदार प्रस्तुति दिए रहिन।