बस्तर के अंदरूनी इलाका मन म कला जत्था के माध्यम ले स्थानीय बोली म शासकीय योजना मन के प्रचार

जगदलपुर, 20 जनवरी 2021। बस्तर जिला के गांव मन म अऊ अंदरूनी ईलाका मन म छत्तीसगढ़ शासन के महत्वपूर्ण योजना मन ल कला जत्था के माध्यम ले गांव मन म स्थानीय बोली म नाच-गान के माध्यम ले पहुंचाए जात हे। जनसंपर्क विभाग कोति ले कला जत्था के माध्यम ले 8 जनवरी ले 19 जनवरी तक संभाग के सबो जिला मन के करीबन 150 जगा म शासन के योजना मन ल पहुंचाए गए हे। जादा ले जादा मनखे मन तक शासन के योजना मन ल पहुंचाए खातिर हाट-बाजार वाले जगा मन ल प्राथमिकता देहे गए हे।
कला जत्था के लोक कलाकार मन गीत-संगीत अऊ प्रहसन के माध्यम ले आकर्षक ढंग ले शासन के योजना मन ल हल्बी, गोंडी भतरी अऊ छत्तीसगढ़ी जइसे स्थानीय बोली-भाखा के माध्यम ले पहुंचाए गीस, येकर से योजना मन ह गांव वाले मन के दिल ल छू लीस। कला जत्था ह मुख्यमंत्री सुपोषण योजना, मुख्यमंत्री हाट-बाजार क्लीनिक, राजीव गांधी न्याय योजना, नरवा, गरुआ, घुरवा, बाड़ी संग कई ठन योजना मन ले जुड़े बर अऊ वोकर लाभ लेहे बर प्रेरित करिस। एकर तहत बस्तर संभाग के सातों जिला म हाट-बाजार अऊ प्रमुख स्थान मन म लोक संस्कृति के संग शासन के जनकल्याणकारी योजना पहुंचाए गई। एकरे संग ए जगा मन म जनसंपर्क विभाग कोति ले प्रकाशित विभागीय योजना मन के पुस्तिका मन के निःशुल्क वितरण करे गीस।