रइपुर, 22 जुलाई 2021 बिरस्पत। मुख्यमंत्री दाउ भूपेश बघेल ह कलमा बैराज ले प्रभावित जांजगीर-चांपा जिला के चन्द्रपुर इलाका के 314 किसान मन ल भू-अर्जन मुआवजा के रूप म 22.78 करोड़ रूपिया के राशि के चेक बाँटत जम्मो किसान मन बधई अउ शुभकामना दीन। मुआवजा बँटई के ये वर्चुअल कार्यक्रम आज मुख्यमंत्री घरू कार्यालय म आयोजित होईस। कार्यक्रम म जलसंसाधन मंत्री श्री रविन्द्र चौबे, स्कूल शिक्षा मंत्री डॉ. प्रेमसाय सिंह टेकाम, मुख्य सचिव श्री अमिताभ जैन, मुख्यमंत्री के अपर मुख्य सचिव श्री सुब्रत साहू संघरीन । विधानसभा अध्यक्ष डॉ. चरणदास महंत, राजस्व अउ आपदा प्रबंधन मंत्री श्री जयसिंह अग्रवाल, संसदीय सचिव श्री विनोद सेवन लाल चन्द्राकर, विधायक श्री रामकुमार यादव के संग अउ आने जनप्रतिनिधि ये कार्यक्रम म वीडियो कॉन्फ्रेंसिंग के माध्यम ले संघरीन ।
मुख्यमंत्री ह कहीन कि कलमा बैराज के निर्माण जांजगीर-चांपा जिला के ग्राम कलमा अउ रायगढ़ जिला के ग्राम बरगांव के बीच महानदी म 377.42 करोड़ रूपिया के लागत ले कराय गे रिहिसे। एकर निर्माण फरवरी 2011 म शुरू होइस अउ मार्च 2016 म बनके तियार होईस। बैराज म जांजगीर-चांपा जिला के 13 ठन गांव के 682 झिन किसान मन के 97.89 हेक्टेयर भूईयां प्रभावित होय रिहिसे। 314 झिन किसान मन के अबड़े दिन ले लटके मुआवजा प्रकरण के निराकरण छत्तीसगढ़ सरकार के प्राथमिकता हवय अउ ये बूता म छत्तीसगढ़ सरकार के जम्मो टीम लगे हे।
विधानसभा अध्यक्ष डॉ. चरणदास महंत ह किसान मन के भू-अर्जन के लटके प्रकरण मन के निदान अउ मुआवजा राशि के बाँटे बर मुख्यमंत्री दाउ भूपेश बघेल के आभार जताइन। किसान मन ल मुआवजा राशि मिलत हे, येह हम सबो बर खुशी के बात हरे। जल संसाधन मंत्री श्री रविन्द्र चौबे कहीन कि ये बैराज ले किसान मन ल सिंचाई बर पानी मिलै, एकर बर मुख्यमंत्री दाउ भूपेश बघेल के निर्देश के परिपालन म जलसंसाधन विभाग द्वारा बैराज के दूनों तट मन म मेगा लिफ्ट एरीगेशन प्रोजेक्ट प्रस्तावित करे गे हवय। एकर ले 15 हजार हेक्टेयर ले जादा के रकबा म किसान मन ल जलापूर्ति होही।
