उत्तर बस्तर कांकेर, नरवा, गरूवा, घुरवा अऊ बारी योजना अंतर्गत कांकेर जिला म 83 गौठान मन के निर्माण करे जात हे। जहां पशु मन बर चारा, पानी के व्यवस्था करे जात हे। एखर से पशुधन संर्वधन म मदद मिलही अऊ जैविकखाद के निर्माण ले गांव वाले मन ल आय के जरिया घलोक मिलही। सबो पशु गौठान म एकत्रित होही, एखर से गांव मन म घुमइया पशु मन ले फसल के नुकसानी रूकही। गौठान म गांव के सबो पशु मन के स्वास्थ्य परीक्षण अऊ टीकाकरण सुनिश्चित होही।
कांकेर जिला के सबो विकासखण्ड मन म एक-एक मॉडल गौठान के निर्माण घलोक करे जात हे। कांकेर विकासखण्ड म सरंगपाल, नरहरपुर म मानिकपुर, चारामा विकासखण्ड म लखनपुरी, भानुप्रतापपुर म मुगवाल, अंतागढ़ म बोदनार, दुर्गूकोंदल म कर्रामाड़ अऊ कोयलीबेड़ा विकासखण्ड के ग्राम हरनगढ़ म मॉडल गौठान बनाये जात हे। ए गौठान मन म सीपीटी निर्माण अऊ पानी, सोखता गड्ढा के निर्माण काम पूरा हो चुके हे। सबो गौठान मन म कटघरा के स्थापना हो गे हे अऊ गौठान समिति अऊ चरवाहा समिति के गठन करे जा चुके हे। गौठान म फेंसिंग के काम प्रगति म हे। पशुधन के पानी पीए बर हर एक गौठान म चार-चार पानी के टंकी, तीन-तीन कोटना अऊ तीन हार्सपावर के सौर ऊर्जा बोरवेल करे गए हे। जेखर से पशु मन ल शुद्ध पीये के पानी मिलही। सबो मॉडल गौठान मन म मचान अऊ पैरावट के रूप म एक महीना के पैरा ग्राम वासी मन के मदद ले एकत्र करे गए हे। हरियर चारा के उपलब्धता बर हर एक गौठान तीर पांच ले बीस एकड़ जमीन म चारागाह बनाये जात हे, जिहां हाईब्रिड नेपियर घास, मक्का, ज्वार, बरसीम आदि चारा के बोआई होवत हे, एखर से बहुत मात्रा म पशु मन ल हरियर चारा सालभर मिलत रहिही संगेच उंखर स्वास्थ्य अच्छा रहिही।
पशुधन विकास विभाग कोति ले सबो गौठान म नियमित रूप ले पशु मन के स्वास्थ्य परीक्षण करे जात हे। मौसमी बीमारी मन ले बचाव बर शत प्रतिशत पशु मन म एचएस अऊ बीक्यू, बिमारी मन के टीकाकरण अऊ कृत्रिम गर्भाधान के काम करे जात हे। गौठान म पशु मन के आना शुरू हो चुके हे, नरहरपुर विकासखण्ड के मानिकपुर गौठान म गांव के 60 ले 70 प्रतिशत पशु प्रतिदिन गौठान म आवत हें।
