राज्य शासन डाहर ले भारतीय रिजर्व बैंक ल पाती लिख के कांकेर जिला, विशेषकर पखांजूर क्षेत्र के बैंक म पइसा के कमी ल दूर करे बर लउहे कार्यवाई के अनुरोध करे गे हे।
छत्तीसगढ़ शासन वित्त विभाग के सचिव श्री कमलप्रीत सिंह ह भारतीय रिजर्व बैंक के महाप्रबंधक श्री एस.के. वर्मा ल चिट्ठी लिख के कहे हे कि पीछू कुछ दिन ले कांकेर जिला के पखांजूर क्षेत्र के बैंक शाखा मन म पइसा के अबड़ कमी हे। ये पइसा के संकट ले स्थानीय मनखे मन ल लेन-देन म अब्बड़ कठिनई होवत हे। एकर ले सरकारी योजना मन ले संबंधित भुगतान, जइसे कि समाजिक सुरक्षा पेंशन अउ मनरेगा मजदूरी के लाभ लाभार्थी मन तक पहुँचई घलो प्रभावित होवत हे।
चिट्ठी म कहे गे हे कि चरम वाम पंथ प्रभावित क्षेत्र मन बर सड़क रद्दा ले पइसा के आवाजाही उपर भारतीय रिजर्व बैंक डाहर ले प्रतिबंध लगाए गे हे। पइसा के परिवहन केवल आर.बी.आई. के देखरेख म हवई -रद्दा ले करे जाथे। श्री कमलप्रीत सिंह ह राज्य के संवेदनशील विशेषकर पखांजूर म नगदी के स्थिति के समीक्षा करे अउ पर्याप्त मुद्रा के उपलब्धता सुनिश्चित करे बर तत्काल कदम उठाए के अनुरोध रिजर्व बैंक ले करे हवय। उन मन कहिन हे कि ये काम बर राज्य सरकार ह जतका जइसे बन परही सहयोग अउ समन्वय करे बर तियार हे।
चटकारा
बिसेसर:- बिहिनिया बिहिनिया अतेक लउहा रेंगत कहाँ जावत हस गा ?
रमेसर:- का करबे भाई, पइसा न कउड़ी, हाथ भर लउड़ी, टाइम पास मार्निंग वाक करत हौं।