उत्तर बस्तर कांकेर, प्रदेश के मुख्यमंत्री श्री भूपेश बघेल ह गरीब परिवार के बेटी मन के चिन्ता करत ऊंखर जनम ले लेके विवाह तक के योजना बनाए हे, जेमां मुख्यमंत्री कन्या विवाह योजना घलोक सामिल हे। ये योजना के उददेश्य गरीब परिवार के बेटी मन के विवाह म होवइया आर्थिक कठिनाइ अऊ फिजूलखर्ची ल रोके अऊ सादगीपूर्ण विवाह ल बढ़ावा देहे, सामाजिक स्थिति म सुधार लाय, सामूहिक विवाह ल प्रोत्साहित करे अऊ विवाह म दहेज के लेनदेन अऊ बाल विवाह के रोकथाम करना हे। गरीबी रेखा ले नीचे जीवनयापन करइया परिवार अऊ मुख्यमंत्री खाद्यान्न योजना अंतर्गत कार्डधारी परिवार के 18 साल ले जादा उम्मर के दू कन्या मन ल ये योजना के अंतर्गत लाभान्वित करे जात हे। योजना के अन्तर्गत हर एक कन्या के विवाह बर अधिक्तम 25 हजार रूपिया के राशि व्यय करे के प्रावधान हे, ये मां ले वर-वधु के श्रृंगार सामान म राशि 5 हजार रूपिया अऊ आन उपहार सामान म 14 हजार रूपिया अऊ वधु ल 01 हजार रूपिया नकद राशि अऊ सामूहिक आयोजन म प्रति कन्या 5 हजार रूपिया तक व्यय करे जा सकत हे। पाछू दू साल म कांकेर जिला के करीबन 06 सौ बेटी मन के मुख्यमंत्री कन्या विवाह योजना अंतर्गत विवाह संपन्न कराए गए हे। जिला के भानुप्रतापपुर म 28 फरवरी 2019 के 350 जोड़ा अऊ कांकेर म 01 मार्च 2020 ल 243 जोड़ा वर-वधु के विवाह संपन्न कराए गीस।
दुर्गूकोंदल विकासखण्ड के ग्राम पर्रेकोड़ो निवासी सुमितबाई बताथे के अपन 22 बछर के बेटी राधिका बर बहुत अकन रिश्ता आवत रहिस, फेर आर्थिक स्थिति बने नइ होए के सेती शादी नइ करवा पात रहेंव। आंगनबाड़ी कार्यकर्ता के माध्यम ले मोला जानकारी मिलीस के गरीबी रेखा के निचे जीवन यापन करइया परिवार मन बर मुख्यमंत्री सामुहिक कन्या विवाह योजना के तहत पंजीयन कराए म सरकार कोति ले विवाह संपन्न कराये जाथे। इही बीच मोर बेटी राधिका बर ग्राम हामतवाही निवासी श्रीमती निरमाबाई के पुत्र सुरेन्द्र दुग्गा के रिश्ता आइस अऊ उमन घलोक अपन परेशानी बताईन दूनो परिवार मन के मुखिया मन के मृत्यु होए के बावजुद माता मन ह सहासिक निर्णय लेत परिवार के सहमति ले मुख्यमंत्री कन्या विवाह बर पंजीयन कराइन अऊ 28 फरवरी 2019 के भानुप्रतापपुर म आयोजित मुख्यमंत्री कन्या विवाह कार्यक्रम म वर-वधु के विवाह संपन्न होइस, अब ओ मन दूनो खुश हे अऊ दाम्पत्य जीवन व्यतित करत 20 अकटूबर 2020 के माता-पिता घलोक बन गये हें। उमन ये योजना ले लाभन्वित होके प्रदेश के मुख्यमंत्री श्री भूपेश बघेल ल कोटी-कोटी बधाई देहे हें।
