उत्तर बस्तर कांकेर, 17 दिसम्बर 2020। राज्य शासन कोति ले महिला मन ल कई रोजगार मूलक योजना मन ले लाभान्वित करे जात हे। जिला म संचालित अंत्यावसायी सहकारी विकास समिति ह बेरोजगार मन ल ऋण सहायता अऊ व्यवसायिक प्रशिक्षण देके स्वावलंबी बनावत हे, संगेच खुद के व्यवसाय स्थापना बर कौशल विकास के प्रशिक्षण घलोक देहे जात हे। जिला मुख्यालय ले करीबन 25 किलोमीटर दूर चारामा विकासखण्ड के ग्राम गोटीटोला निवासी कुन्ती मण्डावी ह अंत्यावसायी विभाग कोति ले संचालित प्रशिक्षण केन्द्र कांकेर म सिलाई प्रशिक्षण ले के खुद के सिलाई सेंटर चलाके अब आत्मनिर्भर बन गे हे।
कुन्ती के बताती मैं गरीब परिवार ले हंव, कक्षा 8वी तक पढ़ाई करे हंव। मोर पारिवारिक स्थिति ठीक नइ होए के सेती जादा पढ़ नइ सकेंव। मोर संउख रहिस के अंत्यावसायी के संचालित स्वरोजगार योजनान्तर्गत ऋण लेके अपन खुद के सिलाई सेंटर खोलवं। जिला अंत्यावसायी सहकारी विकास समिति कांकेर ह राष्ट्रीय अनुसूचित जनजाति वित्त अऊ विकास निगम के सहयोग ले संचालित आदिवासी महिला सशक्तीकरण योजना के अंतर्गत स्थानीय समाचार पत्र म विज्ञप्ति प्रकाशित करे रहिस, ओला पढ़के मैं अंत्यावसायी कार्यालय ले सम्पर्क करेंव अऊ ऋण बर आवेदन जमा करेंव। जिला स्तरीय चयन समिति के बैठक म इकाई लागत 50 हजार रूपिया बर मोर चयन करे गीस। जरूरी कागद जमा करे के बाद मैं अपन पसंद के मुताबिक सिलाई सेंटर बर सामान बिसायेंव। अंत्यावसायी सहकारी विकास समिति ह स्वीकृत ऋण ले सिलाई मशीन अऊ कपड़ा सामान बिसाए के बाद मैं सलवार सूट, पेटी कोट, ब्लाउज आदि तियार करत हंव, जेखर से मोला महिना म करीबन 5 ले 6 हजार रूपिया के बने आमदनी होवत हे।
कुन्ती अब तक 20 ले 25 महिला मन ल सिलाई प्रशिक्षण तको देवत हे। वोखर सिलाई सेंटर खोले के सपना साकार होए के संगेच वोला वोकर दुकान के मालिकाना हक घलोक मिल गए हे। पहिली के अपेक्षा वोखर आर्थिक स्थिति म घलोक सुधार होए हे अऊ वोखर जीवन म खुशीहाली आए हे। वो ह राज्य शासन अऊ अंत्यावसायी विभाग कोति ले संचालित रोजगार मूलक योजना मन बर आभार व्यक्त करे हे।
