उत्तर बस्तर कांकेर : राजपुर के गौठान म बकरी प्रजनन इकाई सुरू

उत्तर बस्तर कांकेर, कलेक्टर डॉ. प्रियंका शुक्ला के निर्देश के मुताबिक नरहरपुर विकासखण्ड के महात्मा गांधी ग्रामीण औद्योगिक पार्क राजपुर गौठान म सिरोही नस्ल के बकरी के प्रजनन इकाई 26 जनवरी 2023 ले प्रारम्भ करे गए हे। प्रजनन इकाई बर जिला प्रशासन कांकेर कोति ले सिरोही नस्ल के 20 बकरी अऊ 02 बकरा देहे गये हे अऊ बकरी पालन के काम उजाला स्व सहायता समूह के महिला मन करत हें। जाबका हे कि सिरोही नस्ल केवल 3-4 महिना म 10 ले 15 किलोग्राम तक के वजन प्राप्त कर लेथे अऊ 9-10 महिना म गर्मी म आ जाथे अऊ करीबन 14-15 महिना म लइका दे देथे। पहिली ब्यात म एक लइका देथे अऊ एखर बाद दू-दू लइका जनमथे। नर बकरा 01 साल म 20 ले 25 किलोग्राम के हो जाथे, ये प्रकार के एक बकरा के बिक्री ले करीबन 10 हजार रूपिया तक के आमदनी हो जाथे। ये इकाई ले साल म कम से कम 20 पठरू होही।
राजपुर के गौठान म प्रजनन इकाई के स्थापना ले जिला म कृषक मन ल उन्नत नस्ल के बकरी के उपलब्धता होही। जिला म अभी तक उन्नत नस्ल के बकरी के उपलब्धता नइ होए ले राज्य के बाहिर ले बकरी लाना परत रहिस, जेखर से बकरी मन म मृत्यु दर जादा होत रहिस अऊ बकरी पालक मन ल आर्थिक नुकसान सहन करना परत रहिस। जिला म प्रजनन इकाई के स्थापना होए ले स्थानीय स्तर म ही सिरोही नस्ल के बकरी मन के उपलब्धता होही। संगेच गोठान म बकरी पालन व्यवसाय म संलग्न स्व सहायता समूह ल साल भर रोजगार मिलथे जेकर से उंखर आमदनी म घलोक वृद्धि होथे। इहां के निवासी मन के आहार म मीट सामान्य रूप ले सम्मिलित होए के सेती स्थानीय हाट-बाजार म घलोक बकरी मन के बड़ मांग रहिथे, जेखर से विपणन म कोनो समस्या नइ होही। इकाई के स्थापना कृषि विज्ञान केन्द्र कांकेर व पशुधन विकास विभाग के तकनीकी मार्गदर्शन म करे गए हे।