छत्तीसगढ़ राज्य युवा महोत्सव : करमा म रायपुर अऊ कबीरधाम ल मिलीस पहिली स्थान

रायपुर, छत्तीसगढ़ राज्य युवा महोत्सव म करमा के कलाकार मन के प्रस्तुति ह सबो ल आकर्षित करिस। सांइस कालेज मैदान के मुख्य मंच म आयोजित करमा नृत्य प्रतियोगिता म राज्य के कलाकार मन ह अपन शानदार प्रस्तुति ले मनखे मन ऊपर अपन छाप छोडिन। अलग-अलग आभूषण के संग, सजे-धजे रंग बिरंगा परिधान म करमा के कलाकार मन देखइया मन ल सुघर तो लगतेच रहिन, उंखर पारम्परिक नृत्य शैली घलोक सबो ल भाइस। मांदर, झांझर के संग छत्तीसगढ़ के कला अऊ संस्कृति उपर आधारित स्थानीय बोली अउ भाखा म प्रस्तुत गीत अऊ करमा नृत्य दर्शक मन ल ताली बजाय बर मजबूर करिस। करमा नृत्य प्रतियोगिता म 15 ले 40 साल के आयु वर्ग म 17 जिला मन के कलाकार मन ह हिस्सा लीन। जेमां पहिली स्थान रायपुर जिला, दूसर स्थान जशपुर अऊ तीसर स्थान सरगुजा जिला ल मिलीस। 40 साल ले जादा आयु वर्ग म कबीरधाम जिला ल पहिली, दूसर स्थान महासमुंद अऊ तीसर स्थान राजनांदगांव जिला ल मिलीस।