रायपुर। छत्तीसगढ़ के तृतीय वर्ग के शासकीय कर्मचारी मन बुधवार के राजधानी के गौरव पथ म प्रदर्शन करिस. कर्मचारी मन के आरोप हे कि साजिश के तहत सिंचाई कॉलोनी ल तोड़े जावत हे, जेखर जांच होना चाही.
प्रदर्शन म शामिल विजय झा ह बताइस कि जल संसाधन के कर्मचारी मन के 1972 म निर्मित शासकीय आवास ल तोड़े जाये के फ़इसला करे गए हे.हमन ल लगथे कि गृह निर्माण मंडल द्वारा भ्रष्टाचार करे जावत, जेखर जांच होना चाही. बिल्डिंग बनाये ले पहली ही तोड़े जावत. पहली हमन ल आवास दे जाए फिर मकान तोड़े जाए, जोन दिन विभाग हमर कॉलोनी के सामने बुलडोजर चलाही, हमन सबो झन वोखर नीचे लेट जाबो अउ आत्महत्या कर लेबो.
प्रदर्शन ले पहली शासकीय कर्मचारी मन मुख्यमंत्री निवास म मुख्यमंत्री के गैर मौजूदगी म वोखर सचिव ल ज्ञापन सौंपत हुए मामला के जांच करे के मांग करिस. कर्मचारी मन के आरोप हे कि गृह निर्माण मंडल के अधिकारी मन के द्वारा मुख्यमंत्री ल बदनाम करे के साजिश करे जावत हे.
गुरतुरगोठ बर दिलीप कुमार