रायपुर, मुख्यमंत्री श्री भूपेश बघेल ह देश के प्रधानमंत्री श्री नरेन्द्र मोदी ल चिट्ठी लिखके छत्तीसगढ़ राज्य बर माटी तेल आबंटन म करे गए कटौती ल वापस लेत हर बडर 1.53 लाख किलोलीटर माटी तेल के आबंटन देहे के आग्रह करे गए हे। मुख्यमंत्री ह कहे हें कि एखर से छत्तीसगढ़ राज्य के सबो गरीब अउ जरूरतमंद परिवार मन ल सार्वजनिक वितरण प्रणाली के माध्यम ले जरूरत अनुसार माटी तेल बिना दिक्कत के बांटे जा सकही।
मुख्यमंत्री ह लिखे हे कि पहिली घलोक मैं ह 26 मार्च 2019 के दिन चिट्ठी लिखके आपसे आग्रह करे रहेंव कि छत्तीसगढ़ म प्रधानमंत्री उज्जवला योजना के क्रियान्वयन के बाद पीडीएस माटी तेल के आबंटन म कटौती करे गीस। एलपीजी सिलेण्डर के जादा कीमत होए अउ राज्य म एलपीजी कोति ले देहे जात सुविधा सीमित होए के सेती ग्रामीण क्षेत्र मन म एकर वार्षिक रिफिलिंग दर नगण्य हे। एखर सेती राज्य के वार्षिक माटी तेल आबंटन ल 1.1 लाख किलोलीटर ले बढ़ाके 1.58 किलोलीटर करे के अनुरोध करे रहिन।
मुख्यमंत्री ह बताइस कि राज्य के पीडीएस माटी तेल के आबंटन म बढ़ोतरी के बलदा मा अभी हाल वित्तीय साल 2019-20 के दूसर तिमाही बर भारत सरकार कोति ले जारी आबंटन म प्रदेश के माटी तेल कोटा म 10 हजार 884 किलोलीटर मने 38 प्रतिशत के कमी करे गए हे। राज्य के 146 विकासखण्ड मन म ले 85 मने 58 प्रतिशत अनुसूचित विकासखण्ड हे। इहां के परिवार के आर्थिक स्थिति हर महिना एलपीजी सिलेण्डर के रिफिल बर एकमुश्त राशि जमा नइ कराए जा सके हे। अइसनहे गैर अनुसूचित क्षेत्र मन म घलोक निवासरत अन्त्योदय अउ प्राथमिकता वाले परिवार बर रिफिल बर एकमुश्त राशि के व्यवस्था हमेसा संभव नइ हो पावत हे। प्रधानमंत्री उज्जवला योजना के अंतर्गत सामिल लाभार्थी ल पीडीएस माटी तेल बर अपात्र मानके राज्य के माटी तेल कोटा म बड़ कमी करे जाना उचित नइ हे।
मुख्यमंत्री ह बताइस कि एलपीजी कव्हरेज ल आधार मानके अभी हाल वित्तीय साल के दूसर त्रैमास म राज्यवार जारी माटी तेल के आबंटन म घलोक विसंगति हे। दूसर त्रैमासिक बर राज्य मन म पीडीएस के माटी तेल म 27 प्रतिशत के कटौती करे गए हे जबकि राष्ट्रीय औसत ले 11 प्रतिशत जादा अर्थात 38 प्रतिशत कटौती छत्तीगसढ़ म करे गए हे।
पश्चिम बंगाल अउ तमिलनाडु राज्य म एलपीजी के कव्हरेज क्रमशः 94 प्रतिशत अउ 99 प्रतिशत होए के बावजूद इहां शून्य अउ 33 प्रतिशत कटौती करे गए हे। गुजरात, बिहार अउ उड़ीसा म ही एलपीली के कव्हरेज छत्तीसगढ़ के समकक्ष होए के बावजूद इंकर तुलना म छत्तीसगढ़ के माटी तेल आबंटन म कटौती अड़बड़ जादा करे गए हे।
मुख्यमंत्री ह छत्तीसगढ़ के स्थिति अऊ इहां माटी तेल के बड़का कटौती ल देखत प्रधानमंत्री ले आग्रह करे गए हे कि सिंगल सिलेण्डर कनेक्शन वाले राशन कार्डधारी ल पीडीएस माटी तेल बर अपात्र झन मानव। अइसनहे छत्तीसगढ़ राज्य जिहां एलपीजी के कव्हरेज राष्ट्रीय औसत अउ आन राज्य मन के तुलना म कम हे, उहां राज्य सरकार के प्रस्ताव के अनुसार माटी तेल के आबंटन निरधारित करे जाए।
