काशी विश्वनाथ धाम कॉरिडोर के उद्घाटन के बाद गंगा आरती म संघरिन पीएम मोदी

वाराणसी, प्रधानमंत्री नरेंद्र मोदी ह आज अपन संसदीय क्षेत्र काशी म काशी विश्वनाथ धाम के लोकार्पण करिन। लोकार्पण के बाद पीएम मोदी ह कहिन कि आप मन इहां जब आहू त केवल आस्था के दर्शन भर नइ करव अब, आप मन ल इहां अपन अतीत के गौरव के अहसास घलोक होही। कइसे प्राचीनता अऊ नवीनता एक संग सजीव होवत हे, कइसे पुरातन के प्रेरणा भविष्य ल दिशा देवत हे, एखर साक्षात दर्शन विश्वनाथ धाम परिसर म हम करत हन। एखर बाद पीएम ह कई कार्यक्रम मन म हिस्सा लीन। संझा गंगा किनारे पहुंचिन। जिहां उमन गंगा आरती म सामिल होइन। एखर ले पहिली वो मन भिनसरहा 10 बजके 40 मिनट म वाराणसी के बाबतपुर एयरपोर्ट पहुंचे रहिन जिहां यूपी के राज्यपाल आनंदीबेन पटेल अऊ मुख्यमंत्री योगी आदित्यनाथ ह हवाई अड्डा म उंखर अगवानी करे रहिन। जानबा हे कि काशी विश्वनाथ धाम के उद्घाटन समारोह म 2,000 ले जादा प्रमुख महंत अऊ संत मन ल नेवता देहे गए रहिस।