कटघोरा, 23 मार्च 2020। एक कोति सरकार नॉवेल कोरोना वायरस COVID-19 के रोकथाम बर सरलग उदीम करत हे उहें कुछ मनखे मन शासन के नियम मन ल हल्का म लेके वोकर अवहेलना करत हें। अइसनहे एक मामला कटघोरा थाना के अंतर्गत आए हे, जेमां एक ठेकेदार ह धारा 144 के उल्लंघन करत आधा दर्जन मजदूर मन ल लेके अवैध बॉन्ड्रीवाल बनवावत रहिस।
जानबा हे के ठेकेदार जऊन जगा म बॉन्ड्रीवाल बनवावत रहिस वो सरकारी जमीन ये जेमा अवैध तरीका ले मौका के फायदा उठाके कब्जा करवावत रहिस। जइसनहे ये बात के जानकारी कटघोरा तहसीलदार रोहित सिंह ल होइस, ओ मन तुरंते अपन मातहत नायब तहसीलदार रवि राठौर, छेत्र के पटवारी अउ आन कर्मचारी मन ल लेके मौका म पहुँचिन। प्रशासनिक अमला ल आवत देख के मजदूर मन अपन औजार ल लेके भाग गएं। उहां केवल निर्माण करवावत ठेकेदार मिलिस।
तहसीलदार के पूछे म ठेकेदार ह गोल मोल जवाब दीस त तहसीलदार ह साजो सामान जपत करके ठेकेदार पदुम सिंह ल कटघोरा थाना के हवाले कर दीस। तहसीलदार के रिपोट म कटघोरा अनुविभागीय अधिकारी सूर्यकिरण तिवारी ह एला धारा 144 के सीधा उलंघन मानत ठेकेदार उपर भादवि के 1860 के धारा 188 के तहत कार्यवाही करे के निर्देश कटघोरा पुलिस ल देहे हें।
