रायपुर, चंदखुरी म चलत कौशल्या महोत्सव के दुसर दिन मुम्बई ले आए प्रसिद्ध गायिका सुश्री कविता पौडवाल के भक्ति गीत मन ह देखईया मन के मन ल मोह लीस। छत्तीसगढ़ के रामनामी समाज के मनखे मन के भक्ति भावना ले सुश्री पौडवाल ह प्रभावित होके रामनामी मन ल राम भजन गाए ल कहिन। सुश्री पौडवाल के गिलौली म रामनामी समाज के मनखे मन ह भगवान राम के भजन गाइन। सुश्री पौडवाल अऊ रामनामी समाज के संघरा प्रस्तुति ले दर्शक मन भक्ति-भाव म सराबोर हो गे।
मुम्बई ले आए शास्त्रीय नृत्यांगना सुश्री रमिन्दर खुराना ह भक्तिमय, शास्त्रीय नृत्य नाटिका के प्रस्तुति दीन। जेमां ओडिशी नृत्य नाटिका के माध्यम ले भगवान राम के गुनमन ल प्रस्तुत करे गीस। अइसनहे वाराणसी ले आए कलाकार व्योमेश शुक्ल ह राम के शक्ति पूजा उपर आधारित नृत्य नाटिका के मंचन करिस।
आज माता कौशल्या महोत्सव के दूसर दिन रामनामी समाज के प्रतिनिधिमंडल अऊ रामायण मानस मंडली मन ह भजन-कीर्तन करिन। भगवान राम उपर आधारित ए प्रस्तुति मन ह दर्शक मन ल मंत्र-मुग्ध कर दीस। जानबा हे कि रामनामी समाज भगवान श्रीराम के नाम ल अपन पूरा शरीर म गोदना के माध्यम ले गोदवाथें। छत्तीसगढ़ के रामनामी समुदाय रामभक्ति के अपन अलग अंदाज, पहनावा अऊ रहन-सहन बर विशेष रूप ले जाने जाथे।
महोत्सव म पर्यटन विभाग के प्रबंध संचालक श्री अनिल साहू, संचालक संस्कृति श्री विवेक आचार्य, चंदखुरी नगर पंचायत अध्यक्ष श्री रविशंकर धीवर, माता कौशल्या मंदिर समिति के पदाधिकारी संग स्थानीय जनप्रतिनिधि अऊ दर्शक बड़ी संख्या म उपस्थित रहिन।
कौशल्या महोत्सव: मुम्बई के कविता पौडवाल के भक्तिमय गीत म मगन होईन मनखे
