कौशल्या महोत्सव: बरसा के संग मंत्री अमरजीत अऊ प्रेमसाय सिंह टेकाम ह करिस शुभारंभ

रायपुर, छत्तीसगढ़ म तीन दिन के कौशल्या महोत्सव आज संझा सुरू होईस। बरसा के बीच संस्कृतिक मंत्री अमरजीत भगत अऊ प्रेमसाय सिंह टेकाम ह एकर शुभारंभ करिन। संस्कृतिक मंत्री अऊ विधायक मन मानस मंडली के संग रामायण पाठ बर बैइठिन। राम भक्ति म मंत्री अऊ विधायक लीन हो गें। आस्था अऊ भक्ति ले भरे ये महोत्सव म छत्तीसगढ़ संग देश के ख्याति प्राप्त कलाकार मन के सांस्कृतिक कार्यक्रम ये आयोजन म होवईया हे। महोत्सव के गरिमा ल बढ़ाय बर देश के मशहूर युवा क्लासिकल सिंगर मैथिली ठाकुर अऊ देश के प्रख्यात गायक पद्म श्री कैलाश खेर घलोक प्रभू श्री राम के ननिहाल चंदखुरी म अपन प्रस्तुति देंहीं।

क्लासिकल गाना बर मशहूर मैथिली ठाकुर माता कौशल्या महोत्सव के दूसर दिन अपन प्रस्तुति देंहीं उहें कैलाश खेर ह महोत्सव के आखिरी दिन 24 अपरेल के अपन प्रस्तुति देंहीं।  देश के इन दुनो सुप्रसिद्ध कलाकार मन ह चंदखुरी के महत्व ल देखत बिना एक पल गंवाए इहां आए बर अपन सहमति देहे हे। माता कौशल्या महोत्सव के पहिली दिन मुंबई के मशहूर भजन गायक कविता पौडवाल अउ श्रीराम के शक्ति पूजा प्रस्तुत करईया वाराणसी के व्योमेश शुक्ला के प्रस्तुति होही।

राज्य सरकार ह माता कौशल्या के जन्मभूमि चंदखुरी के वैभव ल विश्व पटल म स्थापित करे प्रदेश के कला, संस्कृति अउ पर्यटन ल बढ़ावा देहे, महिला सशक्तिकरण, कार्यशील कलाकार मन के संरक्षण, संवर्धन अउ कला दल मन के सरलग विकास बर ये साल गणतंत्र दिवस के बेरा म म माता कौशल्या महोत्सव मनाए के घोषणा करे गए रहिस. छत्तीसगढ़ म स्थित माता कौशल्या मंदिर देश म एक मात्र प्राचीन मंदिर हे।