मुख्यमंत्री ह करिस कौशल्या मातृत्व योजना के शुभारंभ

रायपुर, मुख्यमंत्री श्री भूपेश बघेल ह अंतर्राष्ट्रीय महिला दिवस म प्रदेश के महिला मन ल बड़का सौगात देहे हें। उमन आज राजधानी रायपुर के बीटीआई ग्राउंड म आयोजित राज्य स्तरीय महिला सम्मेलन म सुरक्षित मातृत्व बर पांच हितग्राही मन ल 05-05 हजार रूपिया के चेक प्रदान करके कौशल्या मातृत्व योजना के शुभारंभ करिन। ये योजना के तहत दूसर पुत्री के जन्म म महिला हितग्राही मन ल एक मुश्त 5 हजार रुपिया के सहायता राशि देहे के प्रावधान हे। योजना ले नोनी मन के लालन-पोषण अऊ शिक्षा म मदद मिलही।
मुख्यमंत्री श्री बघेल ह प्रदेश के सबो बहिनी-बेटी अऊ माता मन ल अंतर्राष्ट्रीय महिला दिवस के बधाई अऊ शुभकामना देवत कहिन कि छत्तीसगढ़ के संस्कृति म हमेशा महिला मन के ऊंचा स्थान रहे हे। इहां समाज म महिला मन के स्थिति बेहतर होए के बावजूद आर्थिक भागीदारी के मामला म उमन पुरूष मन ले पीछू रहि गए रहिन। छत्तीसगढ़ म माता-बहिनी मन ह योग्यता, क्षमता अऊ आगू बढ़े के जज्बा के कमी नइ हे। हमन संकल्प के संग महिला मन ल अधिकार अऊ न्याय देवाए के जेन काम करे हन वो सब के सामने हे। महिला मन के ये ताकत महिला मड़ई म देखे जा सकत हे। आज महिला मन गौठान म गोबर ले वर्मी कम्पोस्ट संग कई ठन सामग्रि तियार करत हें। बड़े उद्योगपति मन के समान अब छत्तीसगढ़ के महिला मन गोबर ले पेंट, बिजली घलोक तियार करहीं। बिजली उत्पादन के संग बिजली बेचे के काम करके महिला मन पइसा घलोक कमाहीं।
ये बेरा म नगरीय प्रशासन मंत्री डॉ. शिव कुमार डहरिया, राज्यसभा सांसद श्रीमती छइंहा वर्मा, छत्तीसगढ़ बाल संरक्षण आयोग के अध्यक्ष श्रीमती तेजकुंवर नेताम, विधायकगण श्रीमती अनिता योगेन्द्र शर्मा, सुश्री शकुंतला साहू, श्रीमती संगीता सिन्हा, श्रीमती लक्ष्मी ध्रुव, जिला पंचायत रायपुर के अध्यक्ष श्रीमती डोमेश्वरी साहू संग नगरीय अऊ पंचायती राज संस्थाओं के पदाधिकारी अऊ बड़ी संख्या म महिला मन उपस्थित रहिन।