बिहान योजना के मदद ले कौशिया निषाद बनिस लखपति दीदी, गृहणी ले उद्यमी तक के सफर

CHHATTISGARHI NEWS: दुर्ग, छत्तीसगढ़ के दुर्ग जिला के जनपद पंचायत पाटन अंतर्गत ग्राम पंचायत सिपकोहा के रहवइया श्रीमती कौशिया निषाद ह बिहान योजना ले जुड़ के अपन जीवन ला बदल डारे हे अऊ साधारण गृहणी ले ‘लखपति दीदी’ बन के एक बड़का मिसाल पेश करे हे।
राज्य शासन के सेवा अऊ सुशासन के संकलप ला आगू बढ़ावत प्रशासनिक तत्परता ले ग्रामीण क्षेत्र के महिला मन ला आर्थिक रूप ले सशक्त करे जात हे। इही कड़ी म कौशिया निषाद ह राष्ट्रीय ग्रामीण आजीविका मिशन (बिहान) के ‘बाला मां महिला स्व-सहायता समूह’ ले जुड़िस। समूह म जुड़े के बाद ओला वित्तीय सहयोग अऊ सही मार्गदर्शन मिलिस।
समूह के माध्यम ले ओला पन्द्रा हजार रूपिया के आरएफ, साठ हजार रूपिया के सीआईएफ राशि अऊ बैंक लोन के मदद मिलिस। ये राशि के उपयोग करके कौशिया ह फेन्सी स्टोर, कपड़ा दुकान अऊ पार्लर के व्यवसाय सुरू कर दिस। एखर छोड़ के ओ ह बाड़ी विकास योजना अऊ मनरेगा के तहत पास होए एक लाख बीस हजार रूपिया के सहायता ले मुर्गी शेड के निर्माण घलो करिस अऊ पशुपालन अउ पोल्ट्री व्यवसाय म हाथ अजमाइस।
प्रशासनिक सहयोग, अलग-अलग वित्तीय सुविधा अऊ अपन कड़ा मेहनत के बदौलत आज कौशिया निषाद ह आने-आने व्यावसायिक गतिविधि ले हर बछर लगभग दू लाख रूपिया के शुद्ध मुनाफा कमावत हे। एक साधारण गृहणी ले सफल उद्यमी बने कौशिया ह आज अपन परिवार ला आर्थिक रूप ले समृद्ध बनाए हे अऊ समाज म दूसर महिला मन बर प्रेरणा बनगे हे। ओखर ये सफलता ले ग्रामीण इलाका के अउ आन महिला मन ल आत्मनिर्भर बने के रद्दा मिले हे।