कवर्धा, 16 दिसम्बर 2020। छत्तीसगढ़ के कबीरधाम जिला के एक छोट कन गांव नेवारी के रहइया किसान दिनकर साहू के जीवन म आज बदलाव देखे ल मिलत हे। सचमूच ये किसान के अच्छा दिन आ गए हे। दू साल पहिली वोखर आर्थिक स्थिति बदहाल रहिस, वोखर उपर एक लाख 75 हजार रूपिया के करजा रहिस। ओखर बड़का बेटा बेरोजगार रहिस। करजा लेके खेती-बाड़ी करइया ये किसान ह कभू ये नइ सोचे रहिस, के ओखर करजा एके रात म माफ हो जाही। कहिथें के रात के अंधियार ल चीरत सूरज जरूर निकलथे। इही आस म ये किसान घलोक रहिस। किसान दिनकर साहू के संग अइसनहेच होइस। किसान दिनकर के बताती दू साल पहिली 17 दिसम्बर 2018 के छत्तीसगढ़ के किसान मन बर प्रदेश म नवा बिहान होइस। किसान मन बर नवा सूरज निकलिस। छत्तीसगढ़ म नवा सरकार बनतेच किसान मन के कर्जा माफ होइस। ये कर्जा माफ म ये किसान के घलोक 1 लाख 75 हजार रूपिया माफ होइस।
किसान दिनकर के बताती जब वोला किसान मन के कर्जा माफ होए के खबर मिलीस तब वो ह सपना म घलोक नइ सोचे रहिस के छत्तीसगढ़ के भूपेश सरकार एकाएक एके रात म ही किसान मन ल कर्जा ले मुक्त कर देंहीं। फेर हमार सपना सच होइस अऊ कर्जा ले मुक्ति मिलीस। धान के 25 सौ रूपिया प्रति क्विंटल के सही दाम घलोक मिलीस। ये दौर हमर जइसे किसान मन बर सचमूच राम राज ले कम नइ रहिस। पहलीच साल म कर्जा माफ अऊ 25 सौ रूपिया धान के सही दाम मिलीस एखर से किसान मन के आमदनी सचमुच दोगुनी हो गीस।
किसान दिनकर अपन खुशी अऊ तरक्की साझा करत बताइस के दू साल के भीतर कर्जा माफ के लाभ लेके वो ह एक ट्रेक्टर बिसाइस। एखर ले पहिली वो किराए के ट्रेक्टर लेके खेती-किसानी करत रहिस। एखर से खेती लागत बाढ़ जात रहिस। फेर खुद के ट्रेक्टर लेहे ले खेती-किसानी के लागत कम हो गीस अऊ आमदनी दुगुना हो गीस। एक बेरोजगार बेटा ल एखर से रोजगार तको मिल गए अऊ वो ह खेती किसानी कोति लहुट आइस। पहिली वो बहुत उदास अऊ निराश रहिन फेर रोजगार मिले के बाद वोखर चेहरा म चमक लहुटे हे। वोकर बताती अपन खेती के संगें-संग वो ह ट्रेक्टर ल किराया म घलव देवत हे, एखर से अकतहा आमदनी हो जात हे। किसान के कहना हे के छत्तीसगढ़ सरकार किसान मन ल सही दिशा देवत हे, एखर से किसान मनके दशा सुधरत हे। सचमुच भूपेश सरकार किसान मन के हित म अच्छा काम करत हे। अब हम छत्तीसगढ़िया किसान अभिमान अऊ स्वाभिमान के संग आगू बढ़त हवन।
