पैरा आर्ट, कोसा साड़ी, झारा शिल्प, गोल्डन ग्रास जूट उत्पादन, देशी गुड़ अउ हैंडलूम जइसे बहुत अकन वैराइटीज ले सजीस प्रदर्शनी
मीना बाजार क्राफ्ट मेला फूड स्टाल अउ सांस्कृतिक कार्यक्रम म बाढे़ रहिस रौनक
कवर्धा, 28 फरवरी 2024। कवर्धा के पीजी कॉलेज मैदान म आयोजित सरस मेला म रकम-रकम के रिंगि-चिंगि , आकर्षक, मनमोहक, कलाकृति मन के संग कई ठन जिनिस मन के स्व-सहायता समूह कोति ले प्रदर्शनी लगाए गए हे। कलेक्टर श्री जनमेजय महोबे अऊ जिला पंचायत सीईओ श्री संदीप कुमार अग्रवाल ह स्टॉल के भ्रमण करके समूह के दीदी मन ले चर्चा करिन । ए बेरा म ऊंखर उत्पाद के विसय म जानकारी प्राप्त करके व्यापार ल आगू बढ़ाए बर सुझाव दीन।
जशपुर के महिला स्व-सहायता समूह से बांस ले बने टुकनी अउ डब्बा सबो साइज म उपलब्ध हे। बेमेतरा जिला के समूह ह केला के पेड़ के रेशा ले बने बैग, जैकेट, चटाई आदि रखे गए हे। जांजगीर चांपा ले कोसा सिल्क के बने लुगरा अउ आन कुरथा, रायगढ़ के समूह ह झारा शिल्प रखे हे। वनांचल क्षेत्र ले अवइया समूह ह केमिकल रहित देशी गुड़, दंतेवाड़ा ले आए समूह ह कोदो-कुटकी, हल्दी, मिर्ची अउ आन मसाला अपन स्टाल म रखे हें। उड़ीसा के समूह ह अगरबत्ती जूट उत्पादन अउ गोल्डन ग्लास रखे हे। सागर मध्य प्रदेश के समूह ह आंवला ले बने कई ठन उत्पादन रखे हे। उत्तराखंड के हैंडलूम अउ राजस्थान गाजियाबाद के कपड़ा, पैरा आर्ट संग बहुत अकन उत्पाद प्रदर्शनी सह विक्रय बर रखे गए हे।
सरस मेला म ही क्राफ्ट मेला रखे गए हे, जेमे हैंडलूम के कपड़ा के वैरायटी हे। अचार, चूड़ि, बैग, कालीन, टोपी, चादर जइसे बहुत अकन समान मन आकर्षण के केंद्र हे। फूड स्टॉल के संग मेला म अवइया मनखे मन ल गरमा-गरम स्वादिष्ट स्वल्पाहार मिलत हे। विशेष कर छत्तीसगढ़ी व्यंजन के मांग जादा हे। फूड स्टाल म दुर्ग ले आए महिला समूह के सदस्य ह बताइस कि ऊंखर स्टाल म अतिथि मन के मांग मुताबिक बहुत अकन व्यंजन उपलब्ध हे अऊ व्यवसाय घलोक बहुत अच्छा होवत हे। मथुरा चाट भंडार घलोक लोग मन के पसंद बने हे। लइका मन अउ युवा मन बर मीना बाजार तको सजे हे, जेमां बहुत अकन झूला अउ खेलकूद के साधन रखे गे हे। ए आकर्षण के संग स्वदेशी बाजार के स्लॉट म मनखे मन बर बहुत अकन उत्पादों ल रखे गए हे। जानबा हे कि जिला म 26 फरवरी ले 6 मार्च तक 10 दिन के सरस मेला के आयोजन करे जात हे। जेमां छत्तीसगढ़ ले अउ आन राज्य मन ले स्व सहायता समूह अपन उत्पाद के प्रदर्शनी सह विक्रय स्टाल लगाए हें।
कवर्धा: सरस मेला सजिस आकर्षक अउ मनमोहन प्रदर्शनी ले
