उप मुख्यमत्री श्री विजय शर्मा के कोसिस ले 4.73 करोड़ रुपिया जारी
अब तक 14,518 किसान मन ला मिलिस 51.51 करोड़ के भुगतान
कवर्धा, होली तिहार ले पहिली कवर्धा के गन्ना किसान मन बर बड़का राहत अउ खुसखबरी मिले हे। उप मुख्यमत्री श्री विजय शर्मा के खास कोसिस ले भोरमदेव सहकारी शक्कर उत्पादक कारखाना मर्यादित, राम्हेपुर (कवर्धा) डहर ले गन्ना किसान मन बर 4.73 करोड़ रुपिया के रासि जारी करे गए हे। अब तक कुल 14,518 गन्ना किसान मन ला 51.51 करोड़ रुपिया के भुगतान हो गए हे। बखत म पइसा मिले के ए तरीका ले किसान मन ला आर्थिक सहारा मिले हे, जेकर से ओमन आघू के खेती-किसानी के तैयारी ला बने तरीका ले कर पावत हें। कलेक्टर अउ कारखाना के प्राधिकृत अधिकारी श्री गोपाल वर्मा के देख-रेख म भुगतान के काम सरलग जारी हे।
कारखाना प्रबंधन ह बताइस के अभी के पेराई सीजन म अब तक 2,42,990 मीट्रिक टन गन्ना के पेराई हो गए हे अउ 2,86,743 क्विंटल शक्कर के उत्पादन होय हे। जानबा हे के होली जइसे बड़का तिहार ले पहिली पइसा मिले ले किसान मन ला बड़का राहत मिले हे। भोरमदेव सहकारी शक्कर कारखाना प्रबंधन ह शेयरधारक सदस्य किसान मन अउ दूसर गन्ना उपजइया मन ले सर्वे के मुताबिक जादा ले जादा गन्ना कारखाना म पहुँचाए के बिनती करे हे। प्रबंधन ह कहिन के कहूं गन्ना के पूर्ति बने रहिही त पेराई के बखत ह बाढ़िही, उत्पादन जादा होही अउ किसान मन ला आघू घलो बखत म भुगतान मिलत रहिही।
कारखाना प्रबंधन ह नियम मन के जानकारी देवत बताइस के सदस्य किसान मन ला अपन उपजाए गन्ना ला कारखाना म देना जरूरी हे। कहूं कोनो सदस्य सरलग सर्वे के मुताबिक गन्ना नइ देवय, त ओखर सदस्यता घलो खतम करे जा सकत हे। ए नियम ह सहकारी संस्था अउ किसान मन के हित ला बचाए बर आय।
किसान मन के हित म सरलग कोसिस
भोरमदेव सहकारी शक्कर कारखाना ह इलाका के गन्ना किसान मन के आर्थिक अउ सामाजिक तरक्की के एक बड़का जरिया आय। कारखाना डहर ले एफआरपी के अलावा रिकवरी के रासि अउ सासन डहर ले जारी बोनस के घलो भुगतान करे जाथे। शक्कर कारखाना डहर ले किसान मन ला सासन के मदद ले कम दर म शक्कर घलो बाँटे जाथे। गन्ना के पैदावार बढ़ाय बर उन्नत बीजा घलो देहे जाथे अउ किसान मन ला ट्रेनिंग बर घलो भेजे जाथे। किसान मन बर कारखाना परिसर म जम्मो सुविधा ले भरे ‘बलराम सदन’ बनाय गे हे। संग म, मजदूर अउ किसान भाई मन बर सिरिफ 5 रुपिया म गरम जेवन बर कैंटीन घलो सुरु करे गए हे।