तकनीकी ज्ञान के लेन-देन के जरूरत म होइस चर्चा
रायपुर, उद्योग मंत्री श्री कवासी लखमा के नेतृत्व म कनाडा यात्रा म गए प्रतिनिधि मंडल ह 13 जून के मंझनिया कनाडा के वैंकूवर पहुंचिन। जेमां मुख्य सचिव श्री सुनील कुजूर, अपर मुख्य सचिव श्री अमिताभ जैन अउ सी.एस.आई.डी.सी. के प्रबंध निदेशक श्री पी. अरुण प्रसाद उपस्थित रहिन।
उहां उंखर मुलाकात सुश्री अभिलाषा जोशी कॉउंसिल जनरल, कॉउंसेलेट जनरल ऑफ इंडिया ले होइस। प्रतिनिधि मंडल ले उंखर वैंकूवर के ट्रेड एंड कॉमर्स अउ उद्योग के संबंध म विस्तृत चर्चा होइस। सुश्री अभिलाषा जोशी ह बताइस कि वैंकूवर म उन्नत तरीका ले कई ठन फसल के खेती करे जाथे, जेमा फल जइसे स्ट्राबेरी, ब्लूबेरी, आदि प्रमुख हे। एखरे संगेच उत्पादित फल मन ल बाजार तक ले जाय बर कोल्ड चैन के सुविधा उपलब्ध हे। एखर ले अकतहा म पर्यटन इहां के प्रमुख व्यवसाय हे। उमन ल प्रतिनिधि मंडल कोति ले छत्तीसगढ़ म उपलब्ध संसाधन मन के बारे म जानकारी दे गीस अऊ तकनीकी ज्ञान के आदान-प्रदान के जरूरत उपर चर्चा करे गीस।
