केरा-झरिया के अंजू पैंकरा ह दीस बिहान योजना ले अपन सपना ल नवा उड़ान

कोरब, शासन कोति ले संचालित छत्तीसगढ़ राज्य ग्रामीण आजीविका मिशन ’बिहान’ ले विकासखण्ड पाली के ग्राम पंचायत केराझरिया के अंजू पैंकरा ह अपन सपना ल नवा आयाम देहे हे। श्रीमती अंजू पैकरा के परिवार म इंकर पिता इंदल सिंह पैकरा, माता श्रीमती रामकुंवर हे। पहिली परिवार के आय के मुख्य जरिया खेती-किसानी रहिस फेर जमीन कम होए के सेती खेती-किसानी ले अमदानी सिरिफ महिना म चार हजार ले पांच हजार ही हो पात रहिस, जेखर से परिवार के जीवन यापन मुश्किल ले हो पात रहिस।
शासन के बिहान जइसे महत्वकांक्षी योजना के लाभ लेत श्रीमती अंजू पैंकरा स्वसहायता समूह म सामिल होइस। तीन महिना तक स्वसहायता समूह के सफल संचालन अऊ समूह बर निरधारित पांच सूत्र मन के पालन करे के बाद ये समूह ल 15 हजार रूपिया के अऊ छै महीना के बाद 60 हजार रूपिया के राशि सामुदायिक निवेश कोष के रूप म प्रदान करे गीस। एक साल बाद ये योजना के तहत एक लाख रूपिया के ऋण राशि श्रीमती अंजू पैंकरा ल प्रदान करे गीस जेखर से वो ह किराना दुकान के संचालन करिस। आज अंजू पैंकरा हर महिना आठ हजार रूपिया ले जादा के आमदनी प्राप्त करत हे। पहिली जिहां छोटे कन जमीन म खेती-किसानी करे के सेती बाहुत मुश्किल म जीवन-यापन हो पात रहिस, आज ये योजना ले बढ़े आमदनी ले इंकर जीवन स्तर म काफी सुधार होय हे अऊ परिवार म खुशहाली आए हे। आज ये स्वसहायता समूह कोति ले केंचुआ उत्पादन अऊ हर्बल गुलाल आदि आजीविका आधारित गतिविधि मन केले अकतहा आमदनी प्राप्त करे जात हे।