रइपुर, 29 मई 2021 शनिच्चर। मुख्यमंत्री दाउ भूपेश बघेल के निर्देशानुसार 28 मई के बिहिनियच ले खनिज अधिकारी मन के टीम राज्य के अलग-अलग हिस्सा म लौह अयस्क के परिवहन म रॉयल्टी पर्ची के दुरुपयोग, ओवरलोडिंग, लम्पस फाइन, खनिज के ग्रेड (रासायनिक विश्लेषण) अउ आने मामला मन के जांच अउ ताबड़तोड़ कार्रवाई म जुटे हे। टीम ह लौह अयस्क परिवहन म लगे 105 वाहन मन के जांच करे के बाद 11 ठिन वाहन ल जब्त करके संबंधित इलाका के थाना ल सउंप देहे। जांच म बालोद जिला म भिलाई स्टील प्लांट ल आवंटित खदान के लम्पस फाइन के जानकारी नइ मिले के मामला म बीएसपी ल नोटिस भेजे हवय। अधिकारी मन के टीम कांकेर, राजनांदगांव, बालोद, जगदलपुर, दंतेवाड़ा अउ रइपुर जिला म जगा-जगा जांच पड़ताल म जुटे हवय।
संयुक्त संचालक केन्द्रीय उड़नदस्ता के नेतृत्व म क्षेत्रीय कार्यालय बिलासपुर, जदगलपुर अउ रायपुर के जियोलॉजिस्ट अउ खनिज अधिकारी मन के दल सघन जांच करीन । टीम ह भानुप्रतापपुर क्षेत्र ले 31 वाहन, चारामा क्षेत्र ले 9, जगदलपुर ले 10, रायपुर धमतरी रोड़ म 14, सिलतरा रायपुर क्षेत्र ले 5 अउ राजनांदगांव जिला म 7 अइसे कुल 74 ठिन वाहन मन ले सेम्पल लेके जांच बर केन्द्रीय प्रयोगशाला रायपुर भेजे हवय। टीम ह दंतेवाड़ा के एनएमडीसी ले परिवहन करत 30 अउ जगदलपुर रेल्वे साईडिंग क्षेत्र म 6 ठिन वाहन मन के तको जांच करीन।
कांकेर जिला म स्वीकृत अबड़ अकन निजी कंपनी मन के लौह अयस्क परिवहन के 70 ठिन वाहन मन के जांच करीन जेमा 07 ठिन वाहन ल ओवरलोड, लम्पस फाईन म अन्तर अउ खनिज के ग्रेड म अन्तर होए के शंका के चलत जब्त करके पुलिस के सुपुर्द करे गे हे। बालोद जिला म भिलाई स्टील प्लांट ल स्वीकृत खदान म लम्पस फाईन ले जुड़े जानकारी प्रस्तुत करे बर नोटिस जारी करे गे हे। रायपुर जिला के सिलतरा अउ उरला क्षेत्र म अबड़ कन संयत्र ल देहे जावत लौह अयस्क के जांच म 04 ठिन वाहन ल जब्त करके जांच बर उरला थाना ल संउपे गे हे। ये प्रकार अब तक कुल 105 ठिन वाहन मन के जांच करे गईस, जेमा ले कुल 11 ठिन वाहन के जब्ती कार्रवाई करे गईस । खनिज अधिकारी मन के दल अभीन तको जांच-पड़ताल म जुटे हवय।
