खातू के जमाखोर मन ल ब्लैकलिस्टेड करैं- मुख्यमंत्री दाउ बघेल

रइपुर 24 जून 2021 बिरस्पत। मुख्यमंत्री दाउ भूपेश बघेल ​​ह छत्तीसगढ़ राज्य के कोटा के अनुरूप यूरिया अउ डीएपी के आपूर्ति नई होए अउ जमाखोरी के रोकथाम बर तुर​ते कार्रवाई के हुकुम देहे हे। उन मन रासायनिक खातू के आपूर्तिकर्ता कंपनी मन ल राज्य ल आवंटित मात्रा के अनुरूप यूरिया अउ डीएपी खातू के आपूर्ति सुनिश्चित करे अउ कृषि विभाग के अधिकारी मन ल होलसेलर अउ रिटेलर के स्टॉक ल चेक करके जमाखोरी करइया मन ल ब्लैक लिस्टेड करे बर कहे हे । मुख्यमंत्री ह सबो होलसेलर तीर राहत यूरिया अउ डीएपी खातू ल तुरते रिटेलर मन ल ट्रांसफर कराए के तको हुकुम देहे हे।
मुख्यमंत्री के हुकुम के परिपालन म काली 23 जून के रइपुर म सहकारी विपणन संघ के प्रबंध संचालक अउ अपर संचालक कृषि ह उर्वरक प्रदायक कंपनी, होलसेलर अउ रिटेलर मन के संघरे बइठका लेके अप्रैल ले जून महीना बर छत्तीसगढ़ राज्य ल आबंटित कोटा के अनुरूप यूरिया, डीएपी के बाचत मात्रा के आपूर्ति हर हाल म 30 जून तक सुनिश्चित करे के हुकुम आपूर्तिकर्ता कंपनी मन ल देहे हे।
छत्तीसगढ़ बर महीना जून बर आयातित यूरिया के 58,650 मे. टन आबंटन प्रदाय करे गे हे, जेमा मेसर्स इफको बर आबंटित मात्रा 33,000 मे.टन अउ कृभको बर आवंटित मात्रा 10,000 मे.टन हे। दूनों प्रदायक मन कोति ले आज तक आवंटित आयातित यूरिया के विरूद्ध कोनो आपूर्ति नई करे गे हवय।
अपर संचालक कृषि ह जम्मो जिला के उप संचालक कृषि ल सबो होलसेलर अउ रिटेलर तीर जतका यूरिया, डीएपी अउ आने उर्वरक उपलब्ध हवय,ओकर जांच अउ निरीक्षण करके सरलग सत्यापन कराए के हुकुम दिए हवय। होलसेलर तीर वर्तमान म उपलब्ध उर्वरक स्कंध ल तुरते रिटेलर ल ट्रांसफर करवाए अउ सबो रिटेलर मन ल उपलब्ध उर्वरक स्टॉक ल तुरते किसान मन ल विक्रय करने के तको निर्देश देहे हे।कहूँ हुकुम के पालन म लापरवाही पकड़ म आही त संबंधित रिटेलर, होलसेलर ल प्रतिबंधित करके काली सूची म दरज करे के कार्यवाही करे जाही ।