रायपुर, नगरीय प्रशासन अऊ श्रम मंत्री डॉ. शिवकुमार डेहरिया ह आज न्यू राजेंद्र नगर स्थित गुरू घासीदास सांस्कृतिक भवन म आयोजित ऑल इंडिया ओपन फाइट रेटेड चेस चौंपियनशिप प्रतियोगिता के शुभारंभ करिन। चेस प्रतियोगिता प्रगतिशील छत्तीसगढ़ सतनामी समाज कोति ले आयोजित करे गीस, जऊन 27 जून तक चलही।
डॉ. डहरिया ह चेस प्रतियोगिता के शुभारंभ अवसर म कहिन कि एकर जइसे खेल मन ले खिलाड़ी मन, पढ़ईया लईका मन के तेजी ले मानसिक विकास होथे। उमन प्रतियोगिता म खिलाड़ी मन ले खेल भावना ले खेले अऊ खिलाड़ी मन ल शुभकामना देवत कहिन कि प्रतियोगिता म जीत हासिल करव अऊ अपन गांव प्रदेश अऊ देश के नाम रोशन कर अपन परिवार अऊ समाज के मान बढ़ाव। उमन कहिन कि समाज के मनखे मन ल सामाजिक शैक्षणिक अऊ सांस्कृतिक गतिविधि मन के संगे-संग स्थानीय खेल मन के दिशा म घलोक आगू बढ़े के जरूरत हे। डॉ. डहरिया ह खेल ल बढ़ावा दे बर समाज कोति ले अइसन आयोजन ल सराहनीय कदम बताइस। उमन कहिन कि राज्य सरकार खेल ल बढ़ावा दे बर तत्पर हे। सतनामी समाज कोति ले होवत ये काम सराहनीय हे।
आयोजक मंडल के सदस्य मन ह बताइन कि ऑल इंडिया ओपन रेटेड चेस प्रतियोगिता म देश भर के कई ठन राज्य मन के प्रतिभागी सामिल होए रहिन हें। अभी तक ए प्रतियोगिता बर 13 राज्य मन के भाग लेवईया मन से पंजीयन कराए गे हे। प्रतियोगिता म महाराष्ट्र, तेलंगाना, उत्तर प्रदेश, मध्य प्रदेश, ओडिशा, झारखंड, दिल्ली ,कर्नाटक ,पश्चिम बंगाल जइसे बड़े-बड़े राज्य मन के राष्ट्रीय अऊ अंतरराष्ट्रीय स्तर के खिलाड़ी घलोक ए प्रतियोगिता म सामिल होवत हें। कार्यक्रम म रायपुर उत्तर के विधायक श्री कुलदीप जुनेजा, समाज सेविका श्रीमती शकुन डहरिया, प्रगतिशील सतनामी समाज के अध्यक्ष श्री एम.एल. कोसले, आयोजक मंडल के सदस्य मन म सर्वश्री बबलू त्रिवेंद्रम, विजय कुर्रे, खिलाड़ी अऊ कोच संग स्थानीय नागरिक उपस्थित रहिन।
