रायपुर 22 अकटूबर 2020. मजबूत इरादा अऊ दृढ़ इच्छा शक्ति ले डॉक्टर बने के रद्दा चातर हो गए हे। राजनांदगांव जिला के मोहला विकासखंड के सुदूर ग्राम माडिग-पिडिंग (भूर्सा) के निवासी खिलेन्द्र कुमार ह कड़क मेहनत अऊ लगन ले राष्ट्रीय स्तर म आयोजित परीक्षा नीट (नेशनल एलिजिबिलिटी कम एन्ट्रेंस टेस्ट) म सफलता हासिल करे हेंं। शासन कोति ले ओ ल पढ़ई म भरपूर मदद मिलीस।
विद्यार्थी खिलेन्द्र कुमार के बताती ओकर आर्थिक स्थिति ठीक नइ रहिस फेर शासन के मदद ले वोला संबल मिलीस। अब गांव वाले पढ़ईया लईका मन ल शासन के योजना मन के सहयोग ले आगू बढ़े के अवसर मिलत हे। खिलेन्द्र के पिता श्री गंभीर राम किसान हे अऊ मॉँ श्रीमती दीना बाई गृहिणी हे। कक्षा 9वीं अऊ 10वीं कक्षा के पढ़ई बर ग्राम माडिग-पिडिंग ले 2 किलोमीटर रेंगाकठेरा आत रहिस। वोकर आगू के पढ़ाई एकलव्य आदर्श आवासीय विद्यालय पेण्ड्री राजनांदगांव ले होइस, जिहां वोकर जीवन ल नवा दिशा मिलीस। खिलेन्द्र न्यूरोसर्जन बनना चाहत हे। एकलव्य आदर्श आवासीय विद्यालय म शासन कोति ले रहे अऊ खाए के निःशुल्क व्यवस्था हे। खिलेन्द्र ह बताइस के एकलव्य आदर्श आवासीय विद्यालय पेण्ड्री राजनांदगांव म अऊ प्राथमिक कक्षा के शिक्षक मन ह ओ ल पढ़े बर बहुत प्रेरित करिन। ओ ल आदिमजाति कल्याण विभाग कोति ले नीट म कोचिंग बर रायपुर के ग्रुप ले जोड़े गए रहिस। जऊन परीक्षा के तैयारी बर कारगर रिहिस।
