डॉ. खूबचंद बघेल जयंती समारोह म सामिल होइन मुख्यमंत्री श्री बघेल
दुरूग, 24 जुलाई 2023, मुख्यमंत्री श्री भूपेश बघेल ह काली सिविक सेंटर भिलाई के कला मंदिर म मनवा कुर्मी क्षत्रिय समाज कोति ले आयोजित डॉ. खूबचंद बघेल जयंती समारोह ल सम्बोधित करत कहिन कि डॉ खूबचंद बघेल बहुआयामी प्रतिभा के धनी रहिन। उमन देश के आजादी के बेरा म महात्मा गांधी जी के संग छुआछुत के समाज म विरोध करिन। डॉ. बघेल ह छुआछुत म नाटक लिखके कलाकार के रूप म काम घलोक करिन। समाज के कुरीति मन के खिलाफ अवाज बुलन्द करिन। डॉ. खूबचंद बघेल छत्तीसगढ़ के पहिली स्वप्नदृष्टा रहिन। छत्तीसगढ़ बर ऊंखर योगदान ल कभू भुलाए नइ जा सके। ओ मन एक कुशल संगठक, चिकित्सक, किसान मन के हितैषी, सहकारिता आंदोलन के अग्रणी, लेखक अऊ अच्छा कलाकार घलोक रहिन।
समारोह म विशेषज्ञ नेत्र चिकित्सक डॉ. लाखेशचंद्र मड़रिया ल समाज कोति ले माटीपुत्र सम्मान अऊ बी एस पी ले सेवानिवृत्त अधिकारी-कर्मचारी मन ल अऊ समाज के प्रतिभावान छात्र मन ल सम्मानित करे गीस। कुमारी किरण वर्मा, कुमारी यमुना चक्रधारी ल नीट परीक्षा पास करे म प्रेरणा सम्मान 11 हजार रूपिया अउ प्रशस्ति पत्र देहे गीस। मुख्यमंत्री श्री बघेल ह अपन हाथ ले डॉ. मढ़रिया ल शाल, श्रीफल अउ प्रशस्ति पत्र भेट करके सम्मानित करिन। समारोह म वाद्य संगीत मार्गदर्शिका पुस्तिका के विमोचन घलोक करे गीस। कुमारी प्रांजलि विनायक ह मुख्यमंत्री ल अपन हाथ ले बनाए मुख्यमंत्री के फोटो भेंट करिन। मुख्यमंत्री श्री बघेल ह समाज के अध्यक्ष कोमल धुरन्धर ल घलोक सेवानिवृत्ति सम्मान प्रदान करिन।
मुख्यमंत्री ह कहिन कि डॉ. खूबचंद बघेल ह स्वतंत्रता आंदोलन म भाग लीन। उंखर मां अऊ पत्नी घलोक स्वतंत्रता संग्राम सेनानी रहिन। देश के आजादी के बेरा म हमार राष्ट्र के नवनिर्माण के बेरा रहिस। ओ बेरा म ये सवाल रहिस कि एक नवा भारत म छत्तीसगढ़ ल भारत के नक्शा म कइसे उभारे जाय। छत्तीसगढ़ के मनखे मन के जेन सवाल हे ओखर समाधान कइसे खोजे जाय। डॉ. खूबचंद बघेल ह कहिन कि ए सबो सवाल के एके समाधान हे अऊ वो हे कि अलग छत्तीसगढ़ राज्य बनय। छत्तीसगढ़ बने म कई महापुरुष मन ह अपन योगदान दीन अऊ हमला आज ये नवा राज्य मिले हे। राज्य बने के बाद हमार पुरखाामन के जेन उम्मीद रहिस हम उही उम्मीद ल पूरा करे के काम करत हन। मुख्यमंत्री ह कहिन कि समाज के जड़ता ल सुधारे बर कोनो न कोनो आगू आथे, जेन काम करे हे समाज म वोला सुरता करे जाथे। डॉ खूबचन्द बघेल घलोक अइसनहे व्यक्तिव म ले एक हे। उमन छत्तीसगढ़िया स्वाभिमान ल जगाए के काम करिन। उंखर सोच बहुत बड़का रहिस। छत्तीसगढ़ राज्य के सोच घलोक ये मां सामिल रहिस। आज छत्तीसगढ़ राज्य म छत्तीगसढ़ियाामन ल सही मायने म राज्य बने के अहसास होवत हे। मुख्यमंत्री ह कहिन कि प्रदेश म शराब बंदी समाजिक जागरूकता ले ही सम्भव हो सकत हे। आन नशाबंदी बर घलोक प्रयास होना चाही।
समारोह के विशिष्ठ अतिथि गृहमंत्री श्री ताम्रध्वज साहू ह अपन सम्बोधन म कहिन कि समाजिक संगठन के माध्यम ले हर क्षेत्र म हस्तक्षेप करे जा सकत हे। समाज ल दिशा देहे के काम सबो क्षेत्र मन म होना चाही। छत्तीसगढ़ राज्य के स्वप्नदृष्टा डॉ. खूबचन्द बघेल के व्यक्तित्व अउ कृतित्व ल सुरता करत ये बात मन ल नवा पीढ़ी ल हस्तांतरित करना हे। सांसद श्री विजय बघेल ह डॉ बघेल के स्वप्न के जइसे छत्तीसगढ़ राज्य के निर्माण म सबो के आह्वान करिन। विधायक श्री देवेन्द्र यादव ह घलोक सभा ल सम्बोधित करिन। ये बेरा म विधायक श्री अरूण वोरा, महापौर भिलाई श्री नीरज पाल, महापौर रिसाली श्रीमती शशि सिन्हा, पिछड़ा वर्ग आयोग के उपाध्यक्ष श्री आरएन वर्मा, पूर्व महापौर भिलाई सुश्री नीता लोधी संग मनवा कुर्मी क्षत्रिय समाज के आन पदाधिकारी अउ बड़ संख्या म मनखे उपस्थित रहिन।