नीति आयोग के बैठक म आन राज्य मन के मुख्यमंत्री मन ह नरवा, गरूवा, घुरवा अऊ बाड़ी के परिकल्पना ल सराहिन
रायपुर, मुख्यमंत्री श्री भूपेश बघेल ह कहिन हे कि राज्य शासन से किसान मन के सहकारी अउ ग्रामीण बैंक ले लेहे गये करजा अउ राष्ट्रीयकृत बैंका ले लेहे गए करजा के राशि ल माफ करे के बाद अब राज्य सरकार कोति ले किसान मन के नानपरफार्मिंग खाता मन के वन टाइम सेटलमेंट करे के निर्णय ले गए हे। एखर खातिर राज्य शासन कोति ले किसान के करजा के आधा राशि के अदायगी राज्य शासन कोति ले करे जाही। चाहे ये राशि 20 हजार रूपिया के हो या 20 लाख रूपिया के। किसान मन के चेहरों म खुशहाली लाना राज्य शासन के पहली प्राथमिकता हे।
मुख्यमंत्री श्री बघेल आज जांजगीर-चांपा जिला के विकासखण्ड नवागढ़ के ग्राम अमोरा (महंत) म आयोजित चौपाल कार्यक्रम ल संबोधित करत रहिन। उमन कहिन कि पाछू दिनन म ओ मन नई दिल्ली म नीति आयोग के गवर्निंग काउंसलिंग के बैठक म सामिल होए रहिन। बैठक म कई ठन राज्य मन अउ संघ शासित प्रदेश मन के मुख्यमंत्री मन ह छत्तीसगढ़ के नरवा, गरूवा, घुरवा, अऊ बाड़ी के परिकल्पना ल आन राज्य मन के मुख्यमंत्री ह घलोक सराहे हें, जऊन छत्तीसगढ़ राज्य बर गौरव के बात हे।
श्री बघेल ह कहिन कि आज कबीर जयंती हे। ए पावन अवसर म ग्राम अमोरा म चौपाल के आयोजन खुशी अऊ गर्व के बात हे। उमन मनखे मन ल कबीर जयंती के शुभकामना देवत कहिन कि कबीर एक महान संत, विचारक, समाज सुधारक अऊ एक कवि के रूप म जाने जाथें। उंखर संदेश आज घलोक प्रासंगिक हे।
मुख्यमंत्री श्री बघेल ह कहिन कि छत्तीसगढ़ के परंपरागत खेती किसानी म नरवा, गरूवा, घुरवा व बारी के बहुत जादा महत्व रहे हे। राज्य शासन कोति ले ये मां गांव के सियान मन के परंपरागत खेती के अनुभव अउ कृषि के आधुनिक तकनीक के समावेश करके कृषि आधारित ग्रामीण अर्थव्यवस्था ल अऊ जादा मजबूती प्रदान करे के सार्थक प्रयास करे जात हे। ये मां गांव मन के सहभागिता जरूरी हे। घुरवा मन के वैज्ञानिक तरीका ले उन्नयन करके एला स्मार्ट घुरवा मन के रूप म विकसित करे जात हे।
मुख्यमंत्री ह कहिन कि राज्य के बस्तर म गुणवत्तायुक्त खनिज मन के दोहन करे जात हे। फेर युवा मन ल रोजगार ले जोड़े बर सी अऊ डी ग्रुप के भर्ती के परीक्षा नइ हो पात रहिस। अब दंतेवाड़ा म ही भर्ती के परीक्षा होही। अइसनहे नगरनार स्टील प्लांट के मुख्यालय हैदराबाद के बजाय नगरनार म ही स्थापित करे जाही।
मुख्यमंत्री ह कहिन कि राज्य शासन ह किसानों ले जऊन वादा करिस रहिन, ओला पूरा करिन। उमन कहिन कि शिक्षा के अधिकार अधिनियम के तहत अब 12वीं कक्षा तक अध्ययनरत लइका मन ल निःशुल्क शिक्षा दे जाही।
कार्यक्रम ल प्रदेश के स्कूल, शिक्षा, आदिम जाति अउ आन पिछड़ा वर्ग विकास मंत्री अउ जिला के प्रभारी मंत्री श्री प्रेमसाय सिंह टेकाम ह संबोधित करत कहिन कि नरवा अऊ घुरवा ल नये स्वरूप म विकसित करे जात हे। एखर से किसान आर्थिक रूप ले अऊ जादा समृद्ध होही। चन्द्रपुर क्षेत्र के विधायक श्री रामकुमार यादव ह घलोक संबोधित करिन।
कार्यक्रम ल पूर्व विधायक श्री गोरेलाल बर्मन ह अपन गीत के माध्यम ले नरवा, गरूवा, घुरवा अऊ बाड़ी के महत्व ल प्रतिपादित करिन। ए अवसर म पूर्व विधायक श्री मोतीलाल देवांगन, श्री चुन्नीलाल साहू, महंत रामसुंदर दास, बिलासपुर संभाग के कमिश्नर श्री बी.एल. बंजारे, कलेक्टर श्री जे.पी. पाठक संग बड़ संख्या म ग्रामीण जन उपस्थित रहिन।
