बदलत दंतेवाड़ाः अनंतराम ल मिलीस राजीव गांधी किसान न्याय योजना के पहिली, दूसर अऊ तीसर किस्त के कुल राशि 5 लाख 52 हजार 249 रूपिया

दंतेवाड़ा, राज्य शासन कोति ले चलाए जात किसान मन बर राजीव गांधी किसान न्याय योजना शासन के महत्वाकांक्षी योजना म ले एक हे। दन्तेवाड़ा विकासखण्ड अन्तर्गत ग्राम कामालूर के निवासी किसान अनंतराम बताथे कि ऊंखर तिर 14.94 हेक्टेयर जमीन हे। जेमां वो धान, उड़द मूंग, कोदो, रागी, मक्का के संगे-संग सब्जी के उत्पादन करत हे अऊ अपन जीवन यापन करत हे।



वो ह पऊर साल राजीव गांधी न्याय योजना अंतर्गत कृषि विभाग के माध्यम ले धान अउ आन फसल के पंजीयन कराए रहिस। पऊर साल ओखर 14.94 हेक्टेयर क्षेत्र म लगे धान अउ आन फसल पूरा खराब हो गए रहिस। फसल खराब होए ले वोखर लागत घलोक नइ निकल पाईस। एखर चलते ओ ल आर्थिक दिक्‍कत के सामना करना परत रहिस। वो ह दिन-रात ये चिंता म रहिस के कइसे वो अगला फसल के तैयारी करही, परिवार के पालन-पोषण कइसे करही अऊ लइका मन ल कइसे पढ़ा पाही। ओ ल कहूं राजीव गांधी न्याय योजना के लाभ नइ मिलतिस त वोखर आर्थिक स्थिति अऊ खराब हो जातिस अऊ ओ ल करजा तको लेना परतिस। अनंतराम अगला फसल बर करजा लेहे के सोचतेच रहिस, तभे राजीव गांधी किसान न्याय योजना के पहिली, दूसर अऊ तीसर किस्त के कुल राशि 5 लाख 52 हजार 249 रूपिया वोखर खाता म आ गे। अब अनंतराम अऊ ओखर परिवार अड़बड़ खुश हे। राजीव गांधी किसान न्याय योजना ले ओ मन ल बनेच मदद मिलिस। वो किसान ह राजीव गांधी किसान न्याय योजना ले लाभ मिले ले शासन-प्रशासन के हृदय ले आभार व्यक्त करे हे।