किसान सभा के प्रदर्शन के बाद गाँव वाले मन के समस्या के जांच के आश्वासन

जांजगीर, गांव वाले मन के कई ठन मांग ल लेकर छत्तीसगढ किसान सभा के बैनर तले सैकड़ों गांव वाले मन ह जिला पंचायत कार्यालय म प्रदर्शन करके संबंधित अधिकारी ल अपन समस्या मन ले संबंधित मांग पत्र सौंपिन। प्रदर्शन के नेतृत्व किसान सभा नेता सुखरंजन नंदी अऊ बजरंग पटेल ह करिस।
पेंशनधारी मन ल पाछू दू बछर के बकाया पेंशन राशि देहे, पाछू पांच बछर ले स्वीकृत कार्य मन ल चालू कराए, मनरेगा मजदूर मन ल अकतहा काम के अकतहा मजदूरी भुगतान करे, प्रधानमंत्री आवास योजना मे व्याप्त धांधली रोके, ग्रामीण स्कूल मन मे शिक्षक के कमी दूर करे आदि मांग मन ल लेके ये प्रदर्शन आयोजित करे गीस। किसान सभा के नेता मन ह आरोप लगाइन कि एखर से पहिली घलोक पंचायत के अधिकारी मन ले ये शिकायत कई पइत करे गए हे, फेर आज तक कोनो कार्यवाही नइ होए हे। एखर बादेच गांव वाले मन ल जिला प्रशासन के दरवाजा म आना परे हे। उमन कहिन कि एखर बाद उग्र आंदोलन के रद्दा अपनाए जाही। मांग पत्र म प्रशासन ह जांच दल गठित करके जांच करे के आश्वासन प्रदर्शनकारी मन ल देहे हे।
प्रदर्शन म कंचन बाई, श्याम बाई, मीरा बाई, नीरा बाई, सुमति बाई, कमला बाई, अंबिका बाई, रामवती, लक्ष्मी बाई, टिकती बाई, अन्नपूर्णा, उषा बाई, कालिंदी बाई, विवेक कुमार, जितेंद्र ठाकुर, बृजलाल, सूरजभान, अभिषेक, राहुल, शैलेन्द्र, राजेन्द्र संग अड़बड़ झन ग्रामीण सामिल रहिन।